Open samling i Valen kyrkje

I samband med den tragiske dødsulukka natt til onsdag vert det ope hus i Valen kyrkje i kveld klokka 18.00.

– Her kan du koma for å vera saman med andre i sorga. Her er det rom for å vera stille, tenna lys, gråta og prata, skriv sokneprest Reidar Ådnanes i ei pressemelding.

Representantar frå kommunen sitt kriseteam, kyrkja i Kvinnherad og politiet vil vera til stades.

– Det er forferdeleg det som har skjedd. Det er to familiar som er råka. Nokon har ein gut som er død og nokon har ein som er hardt skadd. Begge deler er ille. Difor har vi ope hus i Valen kyrkje i kveld. Her er det ope for alle, det vert ikkje mykje program, men det vert ein stad kor ein kan ta ein kopp kaffi og vera saman. Det kan det vera trong for når noko slikt skjer, seier Torstein Aarthun frå kriseteamet.

I natt opna dei kantina på Husnestunet for dei som hadde trong for det i den første fasen etter ulukka. Kriseteamet, eller den psykososiale støttegruppa som det eigentleg heiter, er ein ekstra ressurs ein av og til har bruk for i tillegg til lege, politi og ambulanse. Dei kan vera ei støtte for både nære pårørande og andre både med ein gong ei krise oppstår, eller dei kan følgja opp folk i lengre tid etterpå, alt etter behov.