Opna for påmelding til gratis haustferie
Blå Kors Ferier har nyleg lagt ut tilboda dei har om gratis haustferie på sin nettstad. Tilboda kan nyttast av barnefamiliar frå heile landet som fell inn under deira målgruppe.
Målgruppa deira er familiar som har rusavhengigheit, psykiske utfordringar eller lavinntekt tett på livet. Påmeldinga er no i gong, og fristen for å melde seg på er 29. august.
Haustferiane som vert arrangert er ein tur til Norefjell på austlandet og to feriar til Hovden i Setesdalen. Om alle ferieturane informerer Blå Kors at kvar familie får ei hyggeleg leilegheit med alle fasilitetar, fire måltid og gratis deltaking på aktivitetar.
Artikkelen held fram under annonsen.
Skape gode minner
Feriane er organiserte turar, kor mellom 40 og 50 personar ferierer i lag. Ferieleiarar og frivillige i Blå Kors Ferie legg såleis til rette for felles måltid og kjekke aktivitetar, samstundes som det blir sett av god tid for familiane å gjera ting på eiga hand. Målet er å tilby trygge rammer for ferien, der born og unge får skapt gode minner saman med sine føresette.
– På den måten kan de få flotte opplevingar saman, og borna har i tillegg alltid nokon å vera saman med, skriv Blå Kors om tilbodet.
Ferien er gratis, men transport til og frå må dekkjast av familiane sjølv. Organisasjonen melder om at det er mogleg å få dekke reisekostnadar dersom ein til dømes er knytt opp til NAV eller barnevernstenesta.
– For dei som treff aktuelle familiar i sommar, så blir vi veldig glade dersom de tipsar om ferietilboda til hausten, skriv Stine Hermansen Bomann, verksemdsleiar i Blå Kors Ferier i eit informasjonsskriv.
Blå Kors
Blå Kors er ein ideell organisasjon med 54 verksemder over heile landet, nær 1300 medarbeidarar, 1500 frivillige og 2400 aktive medlemmar. Organisasjonen jobbar med førebyggjande tiltak, spesielt retta mot born og unge, samt behandling og oppfølging etter behandling. Blå Kors har i over hundre år gjort ein innsats i Noreg for å hjelpe personar som er direkte eller indirekte ramma av rus.