Opna staseleg bru

I samband med «Kom deg ut-dagen» på søndag vart den flotte gangbrua over Hellandselva ved Husnes offisielt opna.

Rett før arrangementet skulle starta klokka 12.00, la nokre blytunge skyer seg over Husnes og straks etter ausa regnet ned. Leiar i Kvinnherad turlag, Jarle Røstbø, gjorde heilt rett då han føreslo å avventa nokre minutt, for plutseleg vart det opplett igjen.

– Kjekt å sjå at så mange kom, sa Røstbø til dei nærare 40 frammøtte.

Han opplyste at Bergen og Hordaland turlag attende i 2015 spurde om det fanst prosjekt som dei kunne hjelpa Kvinnherad turlag med. Då vart rundkøyringa ved Hellandskrysset nemnt. No vart det ikkje noko meir av ideen den gong, men tanken om bru vaks likevel fram. Dei to siste åra har ein jobba mykje med planane.

Mange hindringar

Turlagsleiaren la til at det har vore mange hindringar og mykje att og fram undervegs i arbeidet.

– Vi hadde håpa at det skulle gå kjapt, men det tok lang tid å få byggjeløyvet på plass. Vi kunne bestilt brua i august 2019, men då var det nye kostar i kommunen som kom fram til at brua var underdimensjonert. No måtte ho tola at ein heil skuleklasse stod og hoppa. Dermed måtte det haldast ny anbodsrunde, sa Jarle Røstbø.

Opphavleg var tanken å setja opp ei hengebru. Seinare vurderte ein stålbru, før ein hamna på ei trebru.

– Visuelt vart jo det mykje finare, slo Røstbø fast.

– Det har vore veldig fint å ha Kvinnherad-stiftinga å springa til når vi trengte midlar. Vi har vore heilt avhengige av det, la han til.

Sparebank 1-stiftinga Kvinnherad har bidrege med støtte i to omgangar til brua. Fyrst gav dei 280.000 kroner, seinare supplerte dei med 150.000. Såleis var det kanskje ikkje unaturleg at leiar Svein Arne Eidsvik fekk æra av å klippa snora.

– Turlaget er eit fantastisk supplement til all den andre friviljuge aktiviteten i Kvinnherad. Dei fortener all honnør og positiv omtale, sa Eidsvik, som oppmoda Kvinnherad Turlag om å søkja på nytt når dei har andre prosjekt dei vil realisera.

 

Trafikksikker

Sjølve brua vart snikra ferdig i Rennebu i Trøndelag og frakta til Kvinnherad. Det vakre rekkverket er derimot bygd lokalt på dugnad. Nedkøyrsla til brua er laga av kommunen.

– Vi set stor pris på innsatsen som kommunen har gjort, meinte Kjell Yri i turlaget.

– Kva betyr brua for turfolket?

– Det er veldig flotte turmoglegheiter i området her. Det kanskje viktigaste med brua er at ein no har fått ein trafikksikker plass å starta turane frå, folk slepp å gå langs hovudvegen for å koma til stien, sa Yri til Grenda.

Etter snorklippet overrekte Jarle Røstbø gåver til Svein Arne Eidsvik, grunneigar Trond-Arild Frøystein og stibyggjar Gunnar Helland. Deretter kunne dei ivrigaste gå halvvegs oppover mot Bremstølen for å delta i naturstien som turlaget hadde laga til.