Opne dagar på Kjeldestøl

Seks onsdagar og éin søndag i sommar vil det vera vertskap til stades på Kjeldestøl ovanfor Rosendal.

Kjeldestøl venelag gjentek suksessen frå i fjor sommar. Onsdagane frå 29. juni til 3. august, vil det vera folk til stades på stølen nokre timar midt på dagen. Dei skal syta for lunk i omnane og vil ynskja alle gjester og turgåarar velkomne.

– Dette er eit tilbod til alle, enten dei er fastbuande i Kvinnherad eller kjem til kommunen med vanleg bil, bubil, buss, sykkel eller båt. Vonleg vil mange nytta høvet til å sjå vakre Kjeldestøl, og gjerne kjøpa seg nykokt kaffi og noko å bita i, skriv Kjeldestøl venelag i ei pressemelding.

Fjorårets opne dagar var svært populære. I år vert tilbodet utvida med ein søndag, nærare bestemt 17. juli.

Førebels har venelaget restaurert fire sel – Bjørkesselet, Jensaselet, Monsaselet og Kristiansselet – utanom Siriselet som har vore intakt heile tida. Arbeidet med dei to siste sela – Peraselet og Torkjellsselet – er i gang, og vonleg står dei klare neste sommar. I tillegg er det sett opp både utedo og ei sjykkje.

– Sela står opne, og alle er velkomne til å stikka innom for å få ei oppleving av korleis livet var på Kjeldestøl fram til 1951, som var siste sommar med stølsdrift, melder Kjeldestøl venelag avsluttingsvis.