Oppmodar folk om å halda seg inne

Politi og brannvesen bed folk om å halda seg innandørs til vinden har løya.

Den kraftige vinden slår hardt i frå seg rundt om i Kvinnherad.

Like før klokka halv fem melde brannvesenet at dei var på veg til Rosendal for å kontrollera taket på Rosendal ungdomsskule.

Vinden har teke tak i noko takpapp øvst på skulebygget, men naudetatane ser det ikkje forsvarleg å gå opp på taket å prøva å redda det.

- Det kjem kraftige kastevindar frå syd-aust, og det er ikkje forsvarleg å senda folk opp på taket, seier politibetjent Håkon Tørvik.

Han vil også oppmoda folk om å halda seg innandørs.

Det gjer også Kvinnherad brann og redning som er på plass på Husnes kor takstein ramlar ned.

- Det blåser takstein av bustadar. På grunn av den kraftige vinden bed lokalt brannvesen om at personar avgrensar å halda seg ute til det heilt nødvendige inntil vinden har løysa, skriv 110 Hordaland på Twitter.

 

Laurdag kveld herja vinden framleis.

Eit tre har velta over vegen ved Børneset i Uskedalen, medan naudetatane var på plass på Kulturhuset Husnes for å sikra bygget.

- Nokon aluminiumsplater har losna frå Kulturhuset. Politiet er på staden og set i gang med sikring, skriv Vest politidistrikt på Twitter.