Opptur med Valedamene

Fyrstkomande laurdag arrangerer Valedamene sitt fyrste løp opp til Svartakjødno.

– Her kan ein delta i Valedamenes første motbakkeløp «Spirdalen opp», eller ein kan velja å gå natursti, som er ei familieløype opp til Svartakjødno. Oppe på toppen sel 7. klasse ved Valen skule kaffi, saft og kaker, skriv Valedamene i ei pressemelding.

Og når Valedamene arrangerer familiedag, tenkjer dei på alle.

– Vi ynskjer å gje eit gratis tilbod til pensjonistar eller andre som ikkje klarer turen på eigenhand. Vi har bilar og mannskap som kan frakta folk oppover slik at fleire kan delta og at ein få moglegheit til å sjå den nye vegen gjennom Valedalen. Ynskjer ein det er det berre å ta kontakt med Valedamene, skriv dei.

I tillegg til å arrangera motbakkeløp, er damene også i full gong med årets siste dugnad til inntekt for bygdahuset i bygda.

– Vi har dessverre oppdaga at det kjem vatn inn i kjellaren, og arrangerer difor loddsal og basar 9. november for å finansiera ei drenering, før vi kan setja i gang oppussing av kjellaren.