Opsanger-Porsvik: Vanskeleg å finna trasé

Å finna traseen for den planlagde gang- og sykkelvegen mellom Opsanger og Porsvik har vist seg vanskeleg.

– Forprosjektet pågår, men vi er ikkje komne til nokre konklusjonar enno. Eg ser det er ynske om gul stripe her, men det er gang- og sykkelveg vi skal byggja. Det er ganske komplisert, og vi må nok sjå etter alternative løysingar, orienterte Kathrine Løno Lahlum til planutvalet.

– Kan vi velja ein heilt ny trasé, til dømes bakom husa? undra Jostein Saghaug (MDG).

– Vi har vore og kikka på det òg. Kanskje vi bør arrangera ein idédugnad, for det er ikkje vits i å byggja ny trasé viss ingen vil bruka han, og heller vil gå langs bilvegen, funderte Lahlum.

Prisen er kalkulert til 88 millionar kroner. Førebels jobbar ein med planlegginga, for bygginga er ikkje finansiert enno. I beste fall vert det byggjestart i 2022.

– Det er hol i asfalten der, så eit eller anna må skje, kommenterte Asbjørn Skår (Ap).

– Men det er ikkje bilvegen som er løfta fram i Kvinnheradpakken, det er det berre gang- og sykkelvegen som er. Med bilvegen snakkar vi om eit heilt anna kostnadsomfang, understreka Lahlum.