Palfinger skal setja verdsrekord
Palfinger sine anlegg på Seim og i Ølve har designa og utvikla verdas største livbåt. No treng dei hjelp av innbyggjarane til å setja verdsrekord.
– Bli med oss og sett ny verdsrekord, skriv Palfinger Marine på si nettside.
Den nye livbåtmodellen skal i fyrste omgang leverast til cruiseskip som er under bygging i Frankrike.
Artikkelen held fram under annonsen.
– Livbåten har fleire sitjeplassar enn ein vanlig Jumbojet, og vi må som reglane seier demonstrera for DNV GL og kunde at det er plass til alle 440 personane om bord, og at vi kan få alle sikkert inn og på plass i livbåten i løpet av 10 minutt, vert det opplyst.
Båten, som er bygd ved fabrikken på Ølve, har fire dører på kvar side, der to ledar ned til fyrste dekk og to ledar opp til øvre dekk. Kvart dekk har sitjebenker, der kvar plass er merka slik at det er enkelt å finne ut kvar ein skal sitja.
Videofilma
Verdsrekordtesten vil skje om kvelden torsdag 20. april på Seim. Følgjande vert opplyst om arrangementet:
- Personar lyt ha bekledning som passar til ein slik test, fritidstøy og lette sko.
- Alle vil få låna redningsvest som skal på under testen.
- Det vert inspektørar og representantar frå reiarlaget med på testen.
- Testen vil bli videofilma, og det vil bli teke bilete for å dokumenta testen.
Artikkelen held fram under annonsen.
- Alle skal bli gitt naudsynte instruksar i forkant som skal fylgjast for å ivareta tryggleiken under testinga.
- Aldersgrensa er fylte 15 år.
Først til mølla
– Vi gjer deg merksam på at påmeldinga er bindande, då det er avgjerande for oss å ha nok folk med denne dagen. Førstemann til mølla-prinsippet, skriv Palfinger, som også har invitert idrettslaga i Kvinnherad til å stilla med folk. Link til påmelding blir distribuert av idrettslaga i løpet av helga.