Pandemien prega drifta i Helse Fonna i fjor
Koronaviruset er hovudårsaken til at Helse Fonna ikkje nådde målkrava om ventetid og fritidsbrot i 2021.
Etter fredagens styremøte i Helse Fonna er konklusjonen tydeleg; deira verksemd vart sterkt prega av pandemien i 2021.
– I periodar av året har det vore relativt lågt smittetrykk i opptaksområdet, men tidleg nyår, påske og særleg sein haust var talet på innlagde pasientar med covid-19 høgt. God innsats frå medarbeidarar, tillitsvalde, vernetenesta, leiarar og beredskapsleiinga har medverka til at føretaket har hatt kontroll over situasjonen.
Artikkelen held fram under annonsen.
Det kjem fram i Helse Fonna si årlege melding, som vart styrebehandla fredag.
Varierande ventetid
Ein av tinga som vart særleg råka av pandemien var ventetida. Helse Fonna har den gjennom året variert frå 68 dagar i januar til 55 dagar i juli, då ventetida var lågast. I praksis betyr det at Helse Fonna ikkje når målkravet om gjennomsnittleg ventetid under 50 dagar.
– Men i november nådde Helse Fonna nasjonale og regionale kvalitetsparameter for ventetid innan vaksenpsykiatri og tverrfagleg spesialisert rusbehandling, informerte direktør Olav Klausen styret om fredag.
Like bra var det ikkje innan barne- og ungdomspsykiatrien, der det har vore ein auke i ventetid frå 2020 til 2021.
– Ein har ikkje nådd det regionale målkravet om 35 dagar ventetid. Hovudårsaka til dette er stor auke i tilvisingar frå oktober 2020 til juli 2021, samt ledige stillingar. Frå juli 2021 har talet på tilvisingar normalisert seg til 2019-nivå, og ventetida er no på veg ned, står det å lesa i ei pressemelding.
I snitt var ventetida i barne- og ungdomspsykiatrien på 42 dagar per 1. desember i Helse Fonna.
Ekstrakostnadar og reduserte inntekter
Helse Fonna når heller ikkje målkravet om ingen fristbrot i 2021.
– Det er fleire årsaker til det, blant anna spesialistmangel og rekrutteringsvanskar, reduksjon i planlagd verksemd i samband med pandemihandtering og redusert aktivitet grunna flytting til nytt bygg ved Haugesund sjukehus. Helse Fonna har god måloppnåing på mange av indikatorane for pakkeforløp for kreftpasientar. Frå januar 2021 til og med oktober 2021 var 71 prosent av alle pakkeforløp gjennomført innan standar forløpstid, heiter det i den årlege meldinga.
Artikkelen held fram under annonsen.
Føretaket prognoserer underskot i 2021, og vil ikkje nå målet om eit overskot på 34 millionar kroner. Årsakene til dette er mellom anna ekstrakostnadar som følgje av pandemien.
– Samt reduserte inntekter, både som følgje av pandemien og innflytting til nytt bygg i Haugesund. Årsresultatet må, som følgje av koronakompensasjonen frå staten, sjåast i samanheng med overskotet i 2020, står det å lesa i meldinga.