Parat til å hjelpa
Dei er unge, arbeidssame og har lyst til å hjelpa. No treng dei berre nokon å hjelpa.
Faget heiter «Innsats for andre», og kvintetten Karianne Moen, Eline Flatland, Camilla Myklebust Ripel, Maren Grøtte og Kristine Holmedal verker etter å få bidra hos nokon.
– Det er eit valfag me har, og me har spesielt lyst til hjelpa eldre. Kanskje nokon treng hjelp til å handla for seg, rydda i heimen eller utanfor, vaska golv eller trilla heim bosdunken? Alt dette er slikt som me kan tenka oss å gjera, og meir til, seier ungdomsskuleelevane.
Artikkelen held fram under annonsen.
Faget er ganske nytt på skulen, men elevane har hatt det sidan skulestart. I haust var dei rundt på skular og barnehagar og hjelpte til. No ynskjer dei å hjelpa og gleda eldre.
– Me veit om nokre som vil ha hjelp av oss, men me tar gjerne i mot fleire. Det er ein fordel at dei som vil ha hjelp bur i Rosendal-området, elles blir det for vanskeleg å koma oss fram til dei, meiner dei.
– Me kjem nok til å fordela oss, men det kjem an på kor store oppgåver det blir.
Viss du ynskjer besøk og hjelp av jentene, er det berre å ta kontakt med rektor på e-post bjorn.olav.tveit@kvinnherad.kommune.no, eller ringa skulen på 53461320 eller 53461323.