Passasjerane var truleg i land i Rosendal
Som Grenda skreiv tysdag kveld, har ein dansk passasjer som var om bord cruiseskipet «SeaDream I» fått påvist koronasmitte. Sidan skipet hadde vore i Rosendal, vil kommunen følgja situasjonen tett.
Artikkelen held fram under annonsen.
Onsdag morgon sendte Kvinnherad kommune ut ei pressemelding med overskrifta «Mistanke om covid-19 på cruiseskip som har vore i Rosendal».
Der står det:
«Ein passasjer på cruiseskipet «SeaDream I» har etter endt cruise og retur til heimlandet Danmark fått påvist positiv covid-19-prøve. Dette melder Folkehelseinstituttet, og kommunen vart kjent med dette seint tysdag kveld 4. august. Det er førebels usikkert når og korleis vedkomande har blitt smitta».
Kommunen opplyser at personen var med på eit cruise som gjekk i perioden 21. juli til 2. august. Den 23. juli hadde skipet anløp i Rosendal.
Var truleg i land
«Kvinnherad kommune hadde representant frå turistinformasjonen ute på skipet, og ein del av gjestene var truleg i land. Kvinnherad kommune følgjer opp situasjonen ved å kontakta Folkehelseinstituttet onsdag morgon, og vil i samråd med dei setje i verk naudsynte tiltak om det er behov for det», skriv kommunen.
Kommuneoverlege Glenn Opland seier at potensiell smittedato er no 12-13 dagar sidan. Dei som eventuelt har blitt smitta vil i så fall ha utvikla sjukdom i ein eller annan grad, men det er altså ikkje kjente smittetilfelle i Kvinnherad no.
Artikkelen held fram under annonsen.
«Det viktigaste no er at innbyggjarar med symptom held seg heime, god smittehygiene (som alltid), og dei som har indikasjonar på sjukdomen sørgjer for å bli testa. Kommunen vil publisera ny melding på si nettside når Folkehelseinstituttet har gitt sine råd; truleg seinare i dag», heiter det.