Peder Bakar melder oppbod

Over 100 år med bakarhistorie er ved ein ende når Peder Bakar stenger dørene på Halsnøy, i Rosendal og på Stord . Tysdag føremiddag tok Peder Sjo Slettebø bedrifta med seg til skifteretten.

– Det er med tungt hjarta me i dag må meddela at me har bede om oppbod for handverksbakeriet Peder Bakar A/S. Med dette er over 100 års bakerihistorie til ende, og me beklagar ovanfor dei tilsette som no står utan jobb, skriv Peder Sjo Slettebø i ei pressemelding.

Etter at han sjølv vart ordførar i september 2015, har han ikkje lenger vore dagleg leiar i bedrifta, men framleis vore eigar.

Selskapet vart etablert i 2011 i dei tidlegare lokala til Toftes Bakeri i Sæbøvik, og utvida med bakeriutsal og kafé i Skålagato i Rosendal i 2012. I 2013 gjekk selskapet for første gong med overskot.

– Me meinte det ville vera bra både for selskapet og dei tilsette at verksemda vart utvida, og satsa i 2015 med nytt bakeriutsal og kafé i Leirvik sentrum. Diverre vart opninga kraftig forseinka, og dette medførte store ekstrakostnadar som til slutt påførte selskapet betydeleg tap i 2015. Så langt i 2016 har det ikkje lukkast å ta inn att tapet, og saman med endra handlemønster på Halsnøy ser styret no at det diverre ikkje er grunnlag for vidare drift, melder Slettebø vidare.

Selskapet er som følge av dette ikkje i stand til å betala gjelda etterkvart som den forfell, og på bakgrunn av dette har dei no sjølve gått til skifteretten og bede om oppbod.

– Me meiner me har snudd alle steinar for å kunna berga selskapet, og alle tenkelege løysingar har vore vurdert til det siste. Det er difor svært tungt å konstatera at dette ikkje har lukkast. Eg er verkeleg lei meg for at ei tradisjonsrik bedrift i regionen no må slutta av, skriv Slettebø.

Det har ikkje vore råd å få Slettebø i tale kring oppbodet.