– Pizzakveld, natt og dag!

Det løner seg å tenkja utradisjonelt. Pizzakveldane på Valen har fylt kyrkja med latter, lyd og song gong på gong i nærare 10 år. Men kveldane har gått fort; samling i kyrkjerommet, pizza og is med påfølgjande spel og leik. Det går unna på ein - to - tre.

Smarte var dei som kom på at det gjekk an å ta pizzakvelden med til Brandøy, med same opne invitasjon og med same mix av alt det som er på pizzakveldane. Og med same flotte flokk, barn, unge og vaksne.

Med tumleplassen rundt om på Brandøy var takhøgda for lyd og rørsle så å seia endelaus. Det kom vel med. For særleg under 50-sporleiken blei konkurransefaktoren høg og tempoet deretter. Dei ivrigaste hadde flest centimeter over sokkelesten.

På rommet hadde me felles skap. Over alt elles var det fellesskap. Og kva er vel viktigare enn det i desse skjerm- og shoppetider?

«Det aller kjekkaste var å få nye vener. Og å bli betre kjend med dei venene eg hadde frå før.» Same svaret kom kontant frå begge barnebarna. Å vera saman med vener, er det ikkje det me vaksne kallar fellesskap? Så var me saman, rundt matborda, på fotballbana, i gymsalen, i peisestova. Med tid for kahoot, luftegeværskyting, klatring og ballspel. Ja, nokon fekk til å med krypa inn i store oppblåsbare ballar. Så dei kunne dytta til kvarandre. Leika på ein ny måte. Vera ilag. Kjenna fellesskap.

Pizzakveldssamlinga frå kyrkjerommet var med til Brandøy, med andakt og song. Og søndag føremiddag var det søndagsskule for store og små. Guds ord blei forkynt i akkurat så store dosar at alle kunne få det med seg. Og når alle får det med seg, ja, då får alle det med seg.

Pizzakvelden varte frå laurdag kl. 10.30 til søndag kl. 14.20, 16.-17. november. Litt av ein pizzakveld! Nei, forresten. Ikkje litt av ein. Meir enn ein pizzakveld.

Me som fekk vera med kunne pusta litt djupare fordi alt ikkje hadde same tempo som på laurdagskveldane i kyrkja. Og det var litt mindre lyd i nokon av romma ein kunne oppsøkja. Dei trufaste arrangørane derimot hadde ekstra mykje å halda orden på. Me tar av hatten for dei som var med desse dagane, samt dei som er med og har ansvaret for dei vanlege pizzakveldane 2 gonger i halvåret.

63 store og små var med i fellesskapet på Brandøy. Eg var ein av dei, og eg hadde mann og to barnebarn med i kofferten. Takk for oss! Nå gler me oss til neste pizzakveld i Valen kyrkje som skal vera siste laurdagen i januar.

 

Marit Elisebet Høines Totland

[gravityform id="11" title="true" description="true"]