Pølser og gele til borna

I går inviterte Omvikdalen bygdekvinnelag barnehageborna og førsteklassingane i Omvikdalen på fest med middag, dessert og song i Dalheim.

– Vi har ikkje ete i barnehagen, så då må vi eta her, forklarte Milla Apeland.

– Eg er kjempesvolten, slo Anna Viktoria Helleland fast.

– Eg har høyrt det vert gele til dessert...?

– Gele! Hurra, ropte dei to i kor.

Begge var stivpynta for høvet. Mange av dei nesten 80 borna hadde kjolar eller skjorter for å avslutta middagssesongen hos bygdekvinnene på stilfullt vis. Dei vart servert det små born brukar å lika

absolutt best; pølse og potetstappe, grønsaker og smør til middag, og gele med vaniljesaus til dessert. Litt mjølkekaker frå opninga av vevstova i Norsafe-bygget kvelden før gjekk også ned på høgkant.

– Vi byrja med middagane i januar 2015, og har servert om lag ein middag i månaden til barnehagen. I dag fekk førsteklassingane også vera med. Vi fekk 10.000 kroner i støtte til dette frå Sparebank1-stiftinga. No er dei brukte opp, så det spørst om vi ikkje må søkja om meir, smilte Astrid Bjørnebøle Hass i bygdekvinnelaget.

På kjøkenet var fem damer i sving; Kirsti Hjelmeland, Solveig Sandvik, Britt Kaldheim, Astrid Bjørnebøle Hass og Else Helleland måtte ta den største gryta i bruk til all potetstappa. Borna sette  stor pris på tiltaket, og song flotte og vårlege songar både før og etter maten.