«Privat eller offentleg omsorg?»

Vibeke Fredheim (Ap) går i ein interpellasjon til kommunestyret hardt ut mot regjeringa sitt forslag om fritt brukarval i helse- og omsorgssektoren. Engasjementet til den lokale arbeidarpartipolitikaren avdekkjer ei klokkartru på det offentlege helsevesenet framfor private aktørar, og ber kommunestyret seia nei til regjeringa sitt forslag.

Det er lett å trekkja fram eit gammalt ordtak Fredrik den store i Preussen skreiv under Den austerrikske arvefølgjekrigen (Hier muss ein jeder nach seiner Fasson selig werden). «Her er det enhver tillatt å bli salig på sitt vis».

Slik eg tolkar Vibeke Fredheim er ho overtydd om at eit offentleg helsevesen, styrt av politikarar, er det beste for pasientar og hjelpetrengjande. Private aktørar får det glatte lag i interpellasjonen, som kommunestyret skal ta stilling til denne veka.

Eg tykkjer haldninga til interpellanten langt på veg er ei nedvurdering av den verdfulle innsatsen som føregår i mange private helseføretak rundt omkring i heile landet, også her i Kvinnherad. Arbeidsplassar i privat sektor har visst ingen verdi i den verda Fredheim lever i! Det er litt skremmande å registrera.

Tidlegare ordførar for Arbeidarpartiet, Aksel Kloster, var ofte talsmann for eit samarbeid mellom det offentlege og private (OPS) i ulike samanhengar, og så langt eg kan minnast var dette ein god måte å løysa offentlege oppgåver på. Kanskje det går an å tenkja litt i dei banar no òg, i staden for å rakka ned på dei private aktørane?

Eg har hatt mykje med det offentlege helsevesenet å gjera dette året, og har berre godt å seia om alle dei som arbeider i transportsektoren, på helsesenteret og ved sjukehuset på Stord. Likevel vil eg føretrekkja å sjølv kunna velja kven eg skal bruka når behovet blir større.

«Vi har ikkje behov for meir kontroll, teljing og måling i kommunen», skriv Vibeke Fredheim i interpellasjonen til kommunestyret. Akkurat det er vi to i det minste einige om!

 

Av Kristian Hus, Husnes