Rapport frå Nord 17

Det har vore mykje dramatikk under årets landsleir, men for speidarane frå Rosendal er alt berre velstand.

Gjengen reiste frå Rosendal førre fredag med sponsa snøggbåt frå Rødne. Etter eit par timar i fly, landa dei i Bodø, der årets landsleir vert arrangert.

– Då vi kom fram sette vi oss ned og fekk i oss litt mat. Etterpå gjekk alle opp og tok ut av konteinaren som vi delte med Ryvarden krets. Det var tunge ting og mykje å bera, men alle hjelpte til. Då konteinaren var tom, tok vi opp lavvo, telt og stjernetelt. Gunn var så snill og laga mat til oss medan vi jobba, så maten var servert då vi var ferdige, rapporterer Maud Førland.

Laurdag fekk speidarane sova litt frampå, før dei sette i gang arbeidet med å byggja etebord og å setja opp ein portal til leirområdet deira. Gruppa fekk sjølvsagt med seg den offisielle opninga av Nord 17, som baud på eit program med mykje humor, song og dans.

 

Ambulansehelikopter

På måndag fekk dei ei oppgåve som innebar å laga popkorn og brenna mandlar. Måndag kveld og natt til tysdag var 2.000 av speidarane med på haik. Som kjent hamna fleire av dei i vanskar, og 58 måtte hentast ut med redningshelikopter. For gjengen frå Rosendal gjekk derimot alt fint.

– Haiken gjekk til Erlingbu, men vi gjekk litt lengre til Pundlihumpan. Det var cirka 6 kilometer. Vi koste oss mykje. Alt er bra med oss, men ambulansehelikopter var rett over oss, opplyser Maud.

Rosendal Speidargruppe deltek med 8 speidarar, 1 rover og 5 vaksne på landsleiren. Dei var i Bodø fram til søndag.