Rasvegen opnar seinast tysdag

Vegen i Nordrepollen vert opna seinast tysdag, men kan opna måndag ettermiddag alt går etter planen i oppryddingsarbeidet.

Det fortel ordførar Hans Inge Myrvold laurdag morgon.

–  Dette er og har vore ein sårbar situasjon for fleire familiar. Sjølv om det er omkøyringsmoglegheiter, så er det ein vanskeleg situasjon å stå oppi når vegen er stengt så lenge som han har vore no, seier Hans Inge Myrvold.

Det er skuleborn som har fått utfordrande veg til skulen og vaksne som anten må ta sjøvegen eller ein lang omkøyringsveg for å koma seg til jobb. Difor har kommunen vore i kontakt med Statens vegvesen og Mesta for å få eit svar på kva tid vegen opnar.

– Vi får opplyst at oppryddingsarbeidet er godt i gang. Dei har brukt mykje tid på å sikra og reinska oppover i lia, og eg vil tru at det er stor aktivitet i området gjennom helga. For sånn som det ser ut no så kan dei opna måndag ettermiddag om alt går veldig bra, om ikkje så vert vegen uansett opna tysdag, seier Myrvold.

 

Rosar innbyggjarane

Det betyr i så fall at vegen opnar fjorten dagar etter at raset gjekk 17. november. For lang tid, meiner ordføraren.

–  Det er ein forferdeleg situasjon. Dette er ein viktig veg for mange, så det at vegen er stengt i fjorten dagar er kritisk. Kvifor det har tatt så lang tid, er noko vi vil ha svar på i ettertid. Eg kjem difor til å retta ei henvending til fylkeskommunen for å bli kjent med dei faktiske forholda, seier Myrvold og legg til:

– Visst det viser seg at det er så utfordrande natur her, som gjer at det er såpass utfordrande å gjera tiltak, så bør det påverka til at vi får ei sikrare trafikkåra med tunnelløysing på strekninga.

For så lenge vegen er sånn som han er i dag, er ordføraren redd for at det vil koma nye ras.

– Det er ingen god følelse, den klumpen i magen fortener ingen å ha, seier han før han rosar innbyggjarane som er råka:

–  Eg vil gje mine varmaste helsingar til innbyggjarane som er råka. Eg vil rosa dei for den seigleiken dei har vist ved at dei har klart å halda hjula i gang til tross for ein svært krevjande kvardag.