Redaktøren jublar: 
– Vi har pleidd å feira med kake, men det blir litt stusseleg

Opplagstala viser at Grenda held fram med å auka, og har det siste året gått frå eit opplag på 2.728 til 2.898 - ein auke på 170. 

– Dette er jo heilt fantastiske tal, igjen, smiler ein godt nøgd redaktør, som også for eit halvt år sidan sa noko liknande.

Morten Nygård synest det nesten er vanskeleg å tru på at oppgangen avisa har hatt dei siste seks-sju åra held fram i dette tempoet. 

– Dette skal vi sjølvsagt gle oss stort over, og ikkje minst må vi uttrykja vår største takksemd til dei trufaste abonnentane som har vore med oss i mange år, samstundes til dei lesarane som har funne ut at dei vil prøva oss i seinare tid. 

Han lovar at avisa skal halda fram med å gjera sitt ytste for å innfri forventingane som blir stilt. 

– Så veit vi òg at dette kan svinga frå måling til måling, så om veksten held fram eller ei, er ikkje enkelt å spå. Vi er iallfall veldig glade for kvar einaste lesar vi har, seier han. 

Skal feirast

Med seg opp på sigerspallen dreg redaktøren - som til informasjon ikkje har fått innvilga sitatsjekk - det han sjølv kallar for «den fantastiske og uvurderlege staben sin», eller noko i dei banar.

– Redaksjonen står på og leverer den eine knallgode saka etter den andre. Så har vi nokre flinke folk som «brekker» avissidene og syt for at produktet blir tiltalande. Og Jarle (Håvik, dagleg leiar i Grenda journ.anm.) som sørgjer for at alt det tekniske er oppe og går, rosar Nygård.

På spørsmål om korleis redaktøren planlegjer å feira dei gode opplagstala - og den uvurderlege staben sin - svarar han at han må ha noko tenkjetid. 

– Vi har pleidd å feira med kake, men det blir litt stusseleg. Diverre rauk moglegheita for Salmon Eye, seier han med eit smil skjegget. 

Og når redaktøren likevel hadde planar om å sprenga budsjettet, stiller journalisten spørsmål om ein firmatur til varmare strøk.

Redaktøren har ikkje ønskja å svara på dette spørsmålet.

Stiller opp

Men kva kjem eigentleg desse gode tala av? Nygård meiner at svaret er samansett.

– Det enkle svaret er at vi lagar ei god avis, tydelegvis - med variert stofftilfang. Vi får også mykje skryt som vi sjølvsagt er veldig glade for. Det som også blir trekt fram er at vi er flinke til å dekkja heile kommunen, også utkantane, poengterer han. 

Det krev også ofte at ein stiller opp på ulike arrangement - både kveldar og i helger. 

– Vi er 3,8 årsverk i redaksjonen fordelt på fire personar, inkludert redaktøren. Vi har sjølvsagt ikkje kapasitet til å dekkja alt vi skulle ønskja, men håpar også at folk har forståing for dette, og veit at vi strekk oss så langt vi kan for å få med oss så mykje som vi greier.