Regjeringa droppa nasjonal rammeplan for vindkraft
Etter massiv kritikk frå kommunane, vel regjeringa no å skrota NVE sitt forslag om nasjonal ramme for vindkraft på land.
Det melder NRK torsdag føremiddag.
Artikkelen held fram under annonsen.
– Det skulle vera eit konfliktdempande tiltak, det har det ikkje vore med dei svara vi ser. Difor har vi tenkt å leggja vekk denne nasjonale ramma og seia at vi ikkje skal ha noko nasjonal ramme for vindkraft framover, seier statsministar Erna Solberg til NRK.
Det var 1. april at NVE presenterte eit forslag til ei nasjonal ramme for vindkraft på land, som var gjort på oppdrag frå Olje- og energidepartementet. Eit forslag som tok føre seg kunnskapsgrunnlaget om verknadane av vindkraft og eit kart over dei 13 områda NVE meinte var best eigna for utbygging.
Blant dei fleire stadar i Kvinnherad kommune.
Forslaget møtte sterk motstand ute i kommunane, også i Kvinnherad gjennom gruppa Nei til vindmøller i Kvinnherad, som i skrivande stund har over 4800 medlemer på Facebook. Motstand som no viser seg å ikkje ha vore forgjeves.
– Det var aldri ein plan om å bygga ut vindkraft, det var ein plan om kor det var best å ha vindkraft om det kom søknader om der, og det legg vi også vekk, seier Solberg til NRK.
Jublar ikkje
Aksjonskomiteen mot vindmøller i Kvinnherad jublar ikkje av den grunn.
Artikkelen held fram under annonsen.
– Dette er vi mykje uroa over. Er dette berre ein ny strategi for å koma forbi folkeviljen? Det er lagt ned mykje arbeid med høyringsuttalar, både i kommunen vår og elles i landet. Vi er kjent med at det vart eit overveldande nei til vindkraft i høyringssvara. Når regjeringa legge ut til høyring, så må dei høyra på kva folk svarar og handla etter det, skriv talsperson for aksjonskomiteen, Annemor Ekeland, på Facebook.
Vidare skriv ho at dei kjem til å følgja den vidare situasjonen tett også i framtida.
– Det er blitt ei djup mistru mellom regjeringa og folket i vindkrafta. No hadde dei ein unik sjanse til å retta dette opp ved å ta lokaldemokratiet på alvor og ta vår kommune og dei andre nei-kommunane ut av samla plan. Me kjem til å vakta dette med argusauge, skriv ho avslutningsvis.