Regjeringa lettar på fleire koronatiltak

Regjeringa gjennomfører i dag ei oppmjuking av fleire koronatiltak. Det betyr blant anna at treningssentera, badeland og symjehallar igjen kan opna.

Som planlagd vart det måndag 15. juni gjennomført fleire større oppmjukingar i regjeringa sine koronatiltak. Blant anna kan treningssentera endeleg opna igjen, til stor glede for TrimX Husnes.

– Då er ventetida endeleg over, og vi kan opna treningssenteret vårt for våre medlemer igjen. Vi startar opp utan gruppetimar, og planlegg dette først frå hausten av. Vi følgjer nye smitteverntiltak for treningssenterbransjen, som vi ventar at alle våre medlemer vil følgja, skriv TrimX på sine nettsider.

 

Frå 50 til 200

I tillegg til det kan profesjonelle idrett- og kulturutøvarar sjå vekk frå avstandsregelen på ein meter ved gjennomføring av arrangement. Det blir også unntak frå éin-metersregelen for personar under 20 år som deltek på sommarskule, skuleavslutningar, sommarleir og andre skuleliknande tilbod.

– Men alt blir ikkje heilt som før. Vi må gjera alt vi kan for å unngå auka smittespreiing utover sommaren. Vi får større fridom, men dette er fridom under ansvar. Vi vil følgja godt med på kva summen av oppmjukingane gjer med smitterisikoen, seier statsminister Erna Solberg i ei pressemelding.

Regjeringa utvidar også grensene frå 50 til 200 personar som kan vera samla på offentleg arrangement. For privatpersonar som samlar seg er gruppestørrelsen framleis 20 personar.