Regjeringa om 17. mai: – Pandemien vil prega feiringa også i år

For andre år på rad vert 17. mai-feiringa prega av koronarestriksjonar.

– Pandemien vil prega feiringa av Norges nasjonaldag også i år. Markeringar av 17. mai må gjennomførast innanfor gjeldande nasjonale og eventuelle regionale og lokale reglar og anbefalingar. Om det er risiko for at 17. mai-tog eller andre arrangement fører til folkesamlingar eller tiltrekker seg personar frå ulike kommunar, bør dei avlysast, skriv regjeringa i ei pressemelding.

På bakgrunn av vurderingar og innspel frå Helsedirektoratet og FHI, kjem ikkje regjeringa med eigne reglar for gjennomføring av nasjonaldagen.

– 17. mai-tog, annonserte talar, leikar, kransenedleggingar og liknande er omfatta av reglane om arrangement i covid-19-forskrifta, skriv regjeringa.

Det betyr at område som ikkje har lokale avgrensingar om arrangementsforbod, kan gjennomføra aktivitetar som 17. mai-tog med gjeldande tal- og avstandsavgrensingar.

– I andre kommunar vil ikkje dette vera mogleg. Vi oppmodar generelt til å gjennomføra arrangement utandørs eller digitalt, seier helse- og omsorgsminister Bent Høie.

På nasjonaldagen gjeld dei overordna råda om å halda seg heime når ein er sjuk, halda avstand og halda henda reine.

I tillegg gjeld dei same råd og reglar som gjeld i dag også på 17. mai:

* Hald minst ein meters avstand til andre. Hald henda reine, og hald deg heime om du er sjuk.

* Avgrens sosial kontakt og møt heller andre utandørs enn innandørs.

* Ikkje ha besøk av fleire enn fem gjester. Om alle gjestene tilhøyrar same husstand, kan de vera fleire, men ein må kunna halda avstand.

* Barn i barnehage og barneskular kan ha besøk frå eigen kohort. Barn og unge kan ha besøk av éin til to faste vener.

* Utsett eller avlys arrangement som samlar personar frå ulike kommunar.

* Det er lov med skjenking ved servering av mat, men skjenkinga stoppar klokka 22.

* Det er eigne nasjonale reglar for arrangement som må følgjast – både på 17. mai og elles.

* Utanom i den privat heim kan ein på private samankomstar samlast maksimalt ti personar innandørs og tjue personar utandørs.

* På offentlege arrangement der folk sit på faste, tilviste plassar er det lov med maks 100 personar innandørs.

* Det er lov med maks 200 personar på offentleg arrangement utandørs om det er mogleg å halda minst ein meters avstand. Om alle sit på faste tilviste plassar, kan ein vera 600 personar (fordelt på 3 kohortar à 200 personar) om det er to meters avstand mellom kohortane.