Reserverer nye millionar til Kvinnherad Arena
Sparebank 1-stiftinga Kvinnherad har vedteke å reservera ytterlegare 3,5 millionar kroner til Kvinnherad Arena.
– Kvinnherad Arena er eit prosjekt som vil vera bra for heile kommunen og Husnes som regionssenter. Kapasiteten i gymsalar og idrettshallen på Husnes er heilt sprengt og det er ventelister for å koma til i ulike idrettsgreiner. Bygging av Kvinnherad Arena vart vedteken i kommunestyret i mars i fjor, og stiftinga håpar med den siste reservasjonen at eksterne bidrag er på rett veg og at prosjektet kan bli sendt ut på anbod så snart som mogleg, står det å lesa i ei pressemelding frå Sparebank 1-stiftinga Kvinnherad.
Artikkelen held fram under annonsen.
Det var på måndagens styremøte at stiftingsstyret vedtok å reservera ytterlegare 3,5 millionar kroner til idrettshallprosjektet på Husnes. Det betyr at Sparebank 1-stiftinga Kvinnherad no har reservert eit samla beløp på 15,5 millionar kroner til Kvinnherad Arena.
– Sparebank 1-stiftinga Kvinnherad skal vera med å løfta frivillig engasjement og har for tida fleire gode prosjekt som er i «støypeskeia» og andre som er godt i gang. Her vil vi nemna Rosendal stadion med byte av dekke, står det å lesa i pressemeldinga.
Til det prosjektet gav stiftinga 3 millionar kroner i juni 2019.
– Prosjekt som Kvinnherad Arena og Rosendal stadion er gode eksempel på frivillig engasjement og viktige prosjekt for folkehelsa i kommunen vår, heiter det i meldinga frå styret.
Tidlegare onsdag vart det klart at det er Kleppestø-firmaet Hordaland Entreprenør AS som skal stå for grunnarbeidet på tomta til idrettshallen.