Rigga og klart for verdsrekord

Etter god innsats frå kommunen sine ulike lag og organisasjonar ligg alt til rette for at dagens verdsrekordforsøk på Palfinger Marine skal bli ein suksess.

– Vi har endeleg fått tak i nok folk, og er utruleg takksame for det engasjementet kommunen sine ulike lag og organisasjonar har vist, seier marknadsleiar Frøydis Nilsen Mathisen ved Palfinger Marine.

Med 440 påmeldte frå 24 ulike lag, er det duka for ny verdsrekord på Seimsfoss torsdag ettermiddag. Det einaste som står att er at dei påmeldte, med god hjelp frå dei 14 personane i båtteamet, skal koma seg trygt om bord i livbåten MPC49 før stoppeklokka viser ti minutt.

– Ein skal ikkje sjå vekk ifrå at vi klarer det på fyrste forsøk, seier produktdirektør Arild Lokøy.

 

Formidabel jobb

Om ikkje er det berre å prøva på nytt. For verdsrekordforsøket er ikkje berre for moro. Det handlar om at Palfinger Marine skal følgja regelverket og demonstrera for DNV GL og kunden at det er plass til alle 440 personane om bord, og at dei kan få alle sikkert inn og på plass i livbåten på ti minutt.

Difor er om bordstigninga lagt opp så tett mot verkelegheita som mogleg, og alt skal føregå som om det gjekk føre seg på eit cruiseskip. Og ettersom vêrgudane ikkje spelar på lag, er hendinga flytta til produksjonshallen.

– Vi ynskjer folk hjarteleg velkomne, og gler oss til å setja verdsrekord saman med kjekke sambygdingar. Vi vil òg takka Idrettslaget Trio ved Hanne Larsen og Rosendal Turnlag ved Arvid Nes og Jostein Hatteberg for ein formidabel jobb, og sjølvsagt alle andre lag som har sanka mange passasjerar for oss, seier Nilsen Mathisen.