Rivinga godt i gang

Måndag starta rivinga av det gamle Rosendalstunet. Innvendig var jobben allereie gjort, og alle vindaugo var tekne vekk før gravemaskinane opna gapa sine.

– Det har gått veldig fint, og vi har ikkje hatt nokon problem med rivinga til no, sa Anne Guri Kildal som var på plass frå kommunen for å inspisera rivearbeidet.

Tre store og ei lita gul maskin hadde varm vårsol og fine forhold til arbeidet i går. Kildal var svært nøgd med at rivinga var godt i gang.

– Vi skulle ha starta rivinga fredag, men på grunn av vinden utsette vi det litt, seier Thomas Kaldestad i Dimmelsvik Entreprenør.

Då dei først starta arbeidet, gjekk det fort. Halve kjøkendelen var nede kring lunsjtider i går.

– Det er kjekt å riva slikt som ein vanlegvis må vera veldig forsiktig med, smilte Kaldestad som hadde fleire unge «knusarar» i gang bak spakane.

Når kjøkendelen er nede, startar entreprenørane på rivinga av fløya som ligg vegg i vegg med kantina. Der har dei sett opp støyskjerming for å minska bråket for bebuarar og tilsette. Hovudinngangen er framleis i bruk, men det vert vurdert fortløpande om ein må nytta ein annan inngang på grunn av arbeidet. Avtalen er at Dimmelsvik Entreprenør skal vera ferdige med rivearbeidet innan månadsskiftet mars/april.