Rosendal får vinmonopolutsal

Torsdag avgjorde styret i Vinmonopolet at Rosendal får polutsal i 2019.

På nettsidene til Vinmonopolet går det fram at dei vil opna minst fem nye polutsal i 2019. To av dei på heilt nye plassar, og eitt av utsala skal liggja i Rosendal.

Ordførar Peder Sjo Slettebø fekk melding om avgjerda torsdag kveld.

– I august var Vinmonopolet på synfaring i Rosendal, og me fekk vist at me har satsa på Rosendal. Det har vore god utvikling og handel i bygda, og det har Vinmonopolet merka seg. Dette vil komplettera Rosendal som turiststad og det vil bidra til å styrka Rosendal handelen i Rosendal, meiner Slettebø.

– Eg har lyst til å gratulera Kvinnherad og Rosendal med dette. Slik eg opplever dette, er det grundige forretningsmessige vurderingar som ligg til grunn for avgjerda om å opna eit polutsal nummer to i Kvinnherad, legg han til.

Grundige vurderingar

Det går fram av nyhenda til Vinmonopolet at etablering av dei nye butikkane er basert på ei samla vurdering av geografisk dekning og kravet til lønsam drift av dei butikkar. Dei viktigaste enkeltkriteriene som er lagt til grunn for etableringane er:

• Detaljhandel, talet millionar kroner i omsetning og kva bransjar som er representerte på tettstaden.

• Befolkningsgrunnlag og busetnadsmønster i kommunen.

• Avstand til ein eksisterande Vinmonopol-butikk.

• At nyetableringa dekker sine eigne kostnader.

– Begge butikkane som er føreslått etablert i 2019 vil dekke egne kostnader. Av omsyn til både Vinmonopolets alkoholpolitiske legitimitet og framtidige soliditet er det rett å prioritere økonomisk trygge etableringar, seier administrerande direktør Hilde Britt Mellbye til Vinmonopolet sine eigne nettsider.