Russen slår eit slag for kreftsaka med folkehelseaksjon

Den komande veka kan ein mosjonera samstundes som ein støttar kreftsaka. Kvinnheradrussen er nemleg klare med sin årlege innsamlingsaksjon.

«Vi har alle ein i familien eller nokon vi kjenner som er ramma av kreft. Det er ein vond sjukdom for dei som blir råka og alle rundt. Vi ønskjer difor å gjera ein innsats for Kreftsaka», skriv russen i ei pressemelding.

Kreft med spreiing er fokuset for årets aksjon.

Frå måndag 7. mars til søndag 13. mars håpar russen å samla inn mest mogleg pengar til Kreftforeninga, som dei meiner er ein heilt avgjerande foreining både i førebyggande arbeid og for dei som får kreft. I tillegg til å gå med bøsser, ynskjer dei å få folk ut av sofaen for å bidra.

Russen har nemleg bestemt å lokka innbyggjarane i kommunen i hopetal til Kaldestadåsen på Husnes, Ådnaklett i Uskedalen og til Sjethaug i Rosendal.

Dei håpar å få lokalt næringsliv med på dette, og har sendt ut mange invitasjonar med oppmoding om å bli med.

5 kroner per besøk

Kvinnheradrussen utfordrar lokale bedrifter til å gje fem kroner for kvar person som registrerer seg på turmåla i denne perioden.

«Skulle det visa seg at heile kommunen går ut til desse turmåla denne veka, set vi ein makspris på 3000 kroner (Vi vil jo ikkje at verksemda di skal gå konkurs) dersom de ønskjer det. Det er sjølvsagt mogleg å gje fem kroner for alle som går, det bestemmer di bedrift sjølv.» skriv dei i invitasjonen.

I følgje russepresident Håvard Bruvik har allereie mange meldt at dei blir med, og dei som enno ikkje har gitt tilbakemelding kan venta å bli purra på dei følgjande dagane.

– Det er verd å bli med, ein kjem seg ut og ein får i tillegg støtte ei god sak. Det er viktig å få fram at alle må skriva seg i bøkene, slik at me veit kven som har delteke, seier Bruvik.

Konkurranse

Onsdag, 9. februar, vil russen sjølv vera tilstades på turmåla mellom klokka 16-19, og då kan flittige turgåarar melde seg på konkurransen deira. Denne kostar det 50 kroner å delta på.

– Dei som blir med på konkurransen kan vinna flotte premiar, som gåvekort på Pizzabakeren, Peppes eller Gry Helges, gåve frå Tess, Vita og Trend, og høgtalar frå Power. Det er mykje flott som dei lokale bedriftene har sponsa oss med, slår Bruvik fast.

Kvinnheradrussen sin innsamlingsaksjon er dermed eit realt kinderegg av eit påfunn. Det bidreg både god helse, til Kreftforeningen og ein kan vinne flotte premiar ved å delta.

– Ambisjonen vår er å samle inn så mykje som mogleg, og å gjera det på ein måte som ingen har gjort tidlegare, sluttar russepresidenten.