Russen spanderte is

Heldige barnehagebarn fekk i går koseleg besøk av russen.

Som alle veit er russen ivrige etter å samla flest mogleg russeknutar. Ein måte å gjera det på er å dela ut is og russekort i barnehagane. Årets KVV-russ har fordelt barnehagane i Kvinnherad mellom seg, og la ut på vegen i går og i dag.

Rosendal Fus barnehage fekk besøk av sju av dei 14 medlemmene i russeminibussen Gatsby. Tore Jan Sønstebø, Erlend Fredheim, Espen Mikal Alfarnes, Jarand Naterstad, Emil Bakke Berntsen, Eirik Alexander Warberg og sjølvaste russepresident Kristian Enes tok ungane med storm då dei gjekk inn porten med is-eskene klare.

– Dette er veldig gøy. Du veit korleis det er når du er liten og russen kjem, det er jo stor stas, sa Kristian.

– Eg vil ha ein med cola, ropte ein spent unge, og fekk ynsket sitt oppfylt.

 

Raude og blå

Etter at isen var svelgd unna, våga fem av dei minste seg bort til dei store gutane. Dei hadde nemleg eit viktig spørsmål.

– Korfor er nokon raude og nokon blå? spurde talspersonen.

Svaret er at einskilde av russen har økonomi i fagsamansetjinga si, andre ikkje.

Grenda lurte på si side om russen hadde fått fri eller berre stukke av frå skulen.

– Vi har midttime no, så vi har fri. Det vil seia, eg håpar vi får fri, opplyste ein noko usikker Kristian Enes då han skjøna at dei ikkje ville rekka attende til Husnes før midttimen for lengst var over. Men når føremålet for eventuelt fråvær er å gleda dei minste innbyggjarane i kommunen, så får vi gå utifrå at lærarane ser med milde auge på det.