Rykte ut til oppdrettsanlegg

Tysdag kveld rykte politiet ut til Borgundøy etter rapportar om nokon som fiska like ved eit oppdrettsanlegg. Men då båten kom fram, var tjuvfiskarane borte.

Kvinnherad lensmannskontor fekk melding om fiskinga klokka 18.45. Saman med utsendingar frå oppdrettsselskapet, rykte dei ut i båt for å sjå etter gjerningspersonane. Men det var ingen å sjå.

Politibetjent Torgeir Fosse stadfestar at det har vore ein del problem med fisking ved oppdrettsanlegg opp gjennom åra.

– Vi ynskjer at utrykkinga skal vera til skrekk og åtvaring for dei som driv med ulovleg fiske. Det hender at vi rykker ut med båt, så ingen skal føla seg for trygge. Faren med å fiska like ved oppdrettsanlegg, er at det fort kan oppstå skade på utstyr, til dømes ved at propellen kjem borti nettet, som kan føra til at laksen rømmer. Vi treng ikkje meir laks i fjorden enn det som allereie har rømt, kommenterer Fosse.