Såg gaupe over Myrdal
Ein vaken hund var med på å sikra Tore Furdal fem minutt med eit sjeldan dyr i kikkerten.
Fredag ettermiddag gjekk Tore Furdal og hunden Trixie opp i fjellet mellom Myrdalsvatnet og Ænesdalen.
– Eg var inne og speida etter hjort, for å nytta det som trening med Trixie, som skal bli ettersøkshund. Me hadde slått opp teltet øvst i Taklio, og sat ved leiren då hunden fekk ferten av gaupa hundre meter nedanfor oss, på Myrdal-sida. Eg hadde ho i kikkerten i fem minutt før ho væra oss og tok ut i retning Melderskin, fortel Furdal.
Artikkelen held fram under annonsen.
Han trudde først det var ein rev, men såg at ho mangla hale.
– I tillegg sprang ho annleis enn reven. Eg tippar det var eit ungdyr.
Sky dyr
Furdal er ein erfaren hjortejeger og har gått i Kvinnherad-fjella i mange tiår. Dette er første gaupa han har sett.
– Me har eit jaktår i Guddal, der ein registrerte gaupe for to år sidan, og eg har høyrt om observasjon i Ljosnes for nokre år sidan. Men det er sky dyr, og vanskelege å få auga på, seier han.
På vestlandet er bestanden av gaupe sporadisk, medan det totalt i Norge er kring 300 dyr.
Gaupa vert gjerne 80-130 cm lang, målt frå nasetipp til halerot, med tillegg av ein ca. 11-25 cm lang hale. Mankehøgda hos vaksne dyr varierer frå 50-70 cm og vekta ligg normalt på ca. 13-35 kg hos vaksne individ. I Noreg, Sverige og Finland vert gjerne hanngaupa ca. 18-26 kg, mens hogaupa vert ca. 13-18 kg.