- Sagt i kommunestyret

 

– Ordførar, eg beklagar at eg ikkje sa ordførar i stad.

Thea Vaage (Ap) har enno ikkje heilt fått taket på kutymane i kommunestyret.

 

– Kven er det som er skjenkekontrollørar i Kvinnherad? Kvifor har eventuelt ikkje Kvinnherad kommune eigne skjenkekontrollørar lengre? Har vi spart pengar på dette?

Synnøve Solbakken (Ap) stussa over at kommunen har gått over til eksterne kontrollørar.

 

– Det kan vera ein fordel med kontrollørar utanfrå.

Kommunedirektør Ragnhild Bjerkvik meiner det kan vera positivt at skjenkekontrollørane ikkje bur i Kvinnherad.

 

– Éin arbeidsplass er viktig, tre er endå viktigare.

Synnøve Solbakken var ikkje heilt nøgd med utflyttinga av kontrollørtenesta.

 

– Eg var ikkje heilt førebudd på at eg skulle halda innlegg. Eg har til og med vore ute og slege plenen medan de hadde pause.

Knut Førland (MDG) var med på møtet i eigenskap av å vera leiar i kontrollutvalet, men at ordførar Hans Inge Myrvold bad han seia noko om utvalet sin årsrapport, kom bardust på.

– Då kan du gå ut og gjødsla plenen, slik at den blir endå friskare og grønare. 

Hans Inge Myrvold gav Førland fri etter at debatten var ferdig.

 

– Eg veit ikkje om Knut (Førland) har logga av, eg håpa han skulle gjera det før eg tok ordet.

Gunnar Våge (Sp) hadde nokre kommentarar til kontrollutvalet sin rapport, som han vona at leiaren ikkje skulle høyra.

 

– Og Are Traavik må skru på mikrofonen.

At ordførar Myrvold må be representantane ta på lyden er blitt ein gjengangar i møta.

– Takk, ordførar. Det har vore mykje styr med mikrofonane i dag.

Are Traavik (Sp) konstaterte at han i så måte var i godt selskap.

 

– Eg kan gjerne vera med og utsetja, men då må det bli i 3,5 år.

Leif Sverre Enes (H) ville utsetja saka om auka varaordførarstilling, ikkje berre til neste møte, men i lang tid.

 

– Eg ser reknestykket til økonomisjefen; det kan vera rett, det kan òg vera feil.

Ove Lemicka (Frp) er ikkje overtydd om at reduserte gebyrinntekter vil kosta kommunen så mykje som økonomisjefen sine utrekningar tyder på.

 

– Eg las ein stad at den siste tida har innskota i bankane auka, for vi har ikkje tid til å bruka pengane våre.

Marit Elisebet Totland (KrF) registrerer uante effektar av koronaen.

 

– Veldig kjekt å lesa i Grenda i dag om gjengen som stilte seg opp i trappa og var klare til å få ned saksbehandlingsbunken. Dette blir det spennande å følgja med på.

Gunnar Våge let seg begeistra av dei tilsette på byggjesakskontoret som vil jobba overtid fram mot sommaren.

 

– Det var dette eg frykta då saka var oppe i formannskapet.

Hege Lægreid Røssland (SF) konstaterte at ho fekk rett då ho såg kva det vil kosta å redusera byggjesaksgebyra.

 

– Det er ein fare for at forslaget fell.

Ove Lemicka innsåg at forslaget om reduksjon i eigedomsskatten ikkje ville få støtte.

– Du må ikkje vera så pessimistisk.

Gunnar Våge prøvde å trøysta.

– Etter den førre avstemminga, så vart eg det.

Lemicka var vonbroten etter at også innspelet om reduserte byggjesaksgebyr vart avvist.