Samlar 500 tilsette til fagdag

Fredag arrangerer oppvekstsektoren i Kvinnherad ein felles fagdag for alle kommunens tilsette i skular og barnehagar.

I tillegg deltek både helsestasjon, barnevern, PPT og avdeling for ressurs og tiltak.

– Det vil seia at me samlar mest 500 tilsette i Kulturhuset Husnes denne dagen, skriv sektorleiar for oppvekst, Anne Sofie Bjelland Kjeka, i ei pressemelding.

Utgangspunktet for fagdagen er nasjonal og kommunal satsing på eit inkluderande barnehage- og skulemiljø.

– Målsetjinga med satsinga er at alle barn og unge skal oppleva eit godt og tilpassa oppvekstmiljø der dei kjenner seg inkluderte utan krenkingar. Universitet- og høgskulemiljø i Hordaland er med i satsinga, og skal vera støttespelarar i arbeidet, heiter det i pressemeldinga.

Arrangementet er todelt og har to førelesarar; Erlend Moen kjem for å ta seg av bolken om mobbing og handtering i barnehage og skule, medan Camilla Otterlei tar bolk nummer to med mobbing i eit foreldreperspektiv.

– Fagdagen er for å motivera dei tilsette og for å heva kompetansen på området. Dei vaksne sine haldningar og måtar å møta barn og føresette på er avgjerande for å lukkast med arbeidet. Det er første gong at heile oppvekstsektoren har ei så omfattande satsing som skal nå absolutt alle barn og unge i kommunen vår, skriv Kjeka i pressemeldinga.