Samlar pengar til livreddande maskin

Ambulansane i Kvinnherad har rundt 2000 utrykkingar i året. I snitt er 12 av dei til hjartestans. No gjer dei tilsette ved ambulansestasjonen ein innsats for å få eit viktig verktøy på plass.

Både på Stord, i Haugesund og i Odda har dei ambulansar med  hjartekompresjonsmaskin. No startar dei tilsette ved ambulansestasjonen på Husnes ein innsamlingsaksjon med von om å skaffa midlar til å kjøpa éin slik til å ha i Kvinnherad også.

– Kvaliteten på hjarte- og lungeredninga me gir blir dårlegare jo lenger me utfører ho. Ein slik maskin vil kunna gje rett frekvens og gå djupt nok på kvart trykk, altså heilt korrekte kompresjonar kontinuerlig ved gjenoppliving, fortel Atle Holm og Petter Nernes ved ambulansestasjonen.

 

2000 utrykkingar årleg

Ambulansestasjonen har 16 tilsette i til saman 14,2 stillingar. Kvart år har dei kring 2000 utrykkingar, og i snitt involverer 12 av dei hjartestans. Maskinen som ambulansearbeidarane ynskjer å skaffa, vil auka behandlingspotensialet av pasienten, meiner dei.

– Det vil frigjera ressursar til å gjera anna behandling parallelt. Det vil også gjera det mogeleg å utføra hjarte- og lungekompresjon medan pasienten blir transportert til sjukehus. Det siste har me ikkje kunna gjera utan å gå på kostnad av eigen tryggleik, understrekar Magni Prestnes Bratsberg.

Dei dekker ikkje berre Kvinnherad kommune, med alle oss 13.200 innbyggjarane som er her, også ambulansebåten vert bemanna med ambulansepersonell frå stasjonen på Husnes. Båten dekkjer også Sunnhordlandsøyane heilt ut til Espevær. Det betyr igjen at Kvinnherad ofte berre er dekka med éin ambulanse.

– I dei tilfella vil ein slik maskin vera ekstra gunstig å ha tilgjengeleg, kommenterer ambulansearbeidarane.

 

Øyremerkte

Den næraste vekene kan alle bedrifter i Kvinnherad venta å få eit brev frå dei tilsette ved ambulansestasjonen.

– Helse Fonna har ikkje midlar til å kjøpa inn slikt utstyr. Både på Stord og i Haugesund har dei fått ein slik maskin i gåve. Det er litt av grunnen til at me går ut og inviterer til eit spleiselag for ein slik maskin. Me gjer dette på dugnad, og alle er velkomne til å bidra, oppmodar ambulansearbeidarane.

Dei har oppretta ein eigen konto innsamlinga, og det som kjem inn er øyremerka til innkjøp av hjartekompresjonsmaskin.

– I ei ideell verd hadde me hatt ein slik i kvar ambulanse, men sidan éin maskin kostar 176.000 kroner i innkjøp, så startar me med å samla inn til éin, seier Holm, Nernes og Bratsberg.

– Heile stasjonen ynskjer det beste for innbyggjarane i Kvinnherad. Dette vil vera eit verdifullt verktøy for å sikra god hjarte- og lungeredning. Ein veit at etter tre minutt går kvaliteten på dette arbeidet ned, uansett kor godt trena ein er. Maskinen vil gjera korrekt arbeid i 90 minutt berre på batterikapasiteten. Ein kompresjonsmaskin kan gi ein betre overlevingsprognose for innbyggjarane i Kvinnherad ved hjartestans, konkluderer ambulansearbeidarane.

Om du ynskjer å gje gåve, kan pengane setjast inn på konto 3330.29.87705. Merk det gjerne kompresjonsmaskin.