Satsar friskt i Aberdeen

Det vil tendera mot løgn å seia at stemninga på Offshore Europe var skyhøg. Trass i dystre tider for oljeindustrien, var det like fullt overraskande mange som hadde funne vegen til Aberdeen sist veke.

Dei fleste standane var litt mindre, og vart gjerne operert med færre folk enn tidlegare. Men noko domedagsstemning var absolutt ikkje å spora. Tradisjonen tru var begge dei kvinnherske livbåtprodusentane godt representert. Denne gongen fann dei også tid til ein heilt ny aktivitet: Fotballkamp. Harding vs Norsafe. I ein skotsk innandørshall, berre ein langpasning og to frå Aberdeen Exhibition and Conference Centre.

 

Litt tvilsamt

– Eg møtte Jan Evald Såtendal på reis for ei tid tilbake. Sidan begge skulle på oljemessa i Aberdeen, prata me litt om det. Då dukka ideen om ein fotballkamp opp, fortel Johan Henrik Lyse i Harding.

Og klokka 20.00 sist tysdag var det avspark for det historiske oppgjeret. Lyse er ikkje veldig interessert i å snakka om resultatet.

– Det var hardt og tøft. Men til skilnad frå Norsafe hadde me ikkje vore i leigemarknaden og henta inn ein meir eller mindre profesjonelle aktør. Som på toppen av alt vart titulert serviceingeniør. Men dette var forhåpentleg starten på noko nytt og spennande, som begge partar håpar kan bli ein aldri så liten tradisjon på framtidige oljemesser, seier han.

 

Ein større bit

Nok fotball i denne omgang. Lyse er nemleg langt meir interessert i å fortelja at Harding satsar friskt i den britiske sektoren av Nordsjøen.

– På den norske kontinentalsokkelen er me den største aktøren. No er tida inne for å ta ein større bit på UK-sida. Då må me vera til stades med fleire folk og tenester lokalt. Produkta våre må også rettast inn mot denne marknaden. I klartekst vil det seia at me kjem til å byggja oss opp i Aberdeen. Bjørn Erik Eliassen og eg skal vera med og gjera ein ekstra innsats saman med eksisterande og nye folk her borte.

Og Lyse har meir på lager:

Omtrent alle som er innom standen vår har fått med seg at me fekk Sverdrup-kontrakten, og at Harding framleis er den einaste aktøren som har implementert den nye DNV-OS-E406-standarden på båtane sine, smiler seljaren frå Uskedalen, men som det meste av sitt vaksne liv har budd i Bergen sentrum.

PS! Mest 56.000 gjester frå over 100 ulike land var innom Offshore Europe sist veke. 1535 ulike utstillarar hadde funne vegen til Aberdeen, og det er berre messa for to år sidan som har samla fleire folk.

Tekst/foto:Vidar Alfarnes

 

Nett opna kontor

Også Norsafe satsar på Aberdeen. Selskapet har nett opna kontor i den skotske kystbyen.

Magnar Bøyum er ein annan kvinnhering som har heimeadresse utanfor kommunen. Han bur nemleg i Nederland. Ikkje så langt frå Utrecht. Der har han og familien vore i snart 20 år. Rett før oljemessa i Aberdeen var han og eldstejenta Ingrid ein kjapp biltur til Paris.

– Ho tek økonomiutdanning i Nederland, men skal vera på utveksling på ein fransk skule dei neste fire månadane, fortel pappa Bøyum.

– Ingrid og søstera Anya (17) er begge fødde og oppvaksne i Nederland, så det har blitt nokre år vekke frå Rosendal, smiler ein som i mange år jobba for Harding, men som sidan februar har hatt Norsafe som arbeidsgjevar. Der driv han både med sal og forretningsutvikling.

– Eg har vorte teken godt imot, og jobbar no med ein del veldig spennande saker. Som det er litt for tidleg å snakka høgt om, seier Bøyum.

Betre rusta

Til liks med dei fleste andre merkar også han at tidene er tøffe.

– Det er bra med folk på messa, men ikkje så mange av dei me helst vil møta. Men det nyttar heller ikkje å melda seg ut. Dette kjem til å snu. Den dagen skal Norsafe vera betre rusta enn nokon gong. Difor har me nett opna kontor her i Aberdeen, og fått på plass ein svært dugande sjef, forsikrar Magnar Bøyum.