Satsar på elektrolyse

SKL har skrive under på ein intensjonsavtale med Greenstat og TTI, med mål om å levera kraft til hydrogenproduksjon i 2019. For ilmenittsmelteverket TTI (Tizir Titanium & Iron) i Tyssedal betyr dette at dei kan redusera CO2-utsleppa med 90 prosent.

– Skal vi nå klimamål, er vi nøydde til å erstatta fossil energi med fornybar, seier direktør for SKL Produksjon Kjetil Harestad, og legg til at for TTI er dette ei miljøforbetring som tek dei frå den svartaste til den reinaste energien.

TTI Tyssedal nyttar nemleg kol i produksjonen, men har no planar om å byta ut kolet med hydrogen. Det vil redusera CO2-utsleppa deira med 90 prosent. Hydrogen vert vunne ut av vatn gjennom elektrolyse. Brukar ein hydrogen som drivstoff i bilar er det vatn som kjem ut når energien er brukt. Å laga vatn til hydrogen krev meir energi enn ein får ut, men det gjer at ein kan lagra energien til han skal nyttast. Ei utfordring kan likevel bli å flytta på hydrogen, fordi han brenn utan flamme må han kjølast sterkt ned når han skal fraktast.

Testanlegg

TTI skal først byggja eit demonstrasjonsanlegg for hydrogen i mindre skala for å testa ut detaljane i produksjonen. Intensjonsavtalen går ut på at Greenstat skal byggja ein hydrogenfabrikk innan utgangen av 2019, og SKL skal levera kraft til denne.

– Vi ønskjer at krafta vi har i dag skal takast i bruk på ein god og fornuftig måte. Dette vert ei fantastisk miljøvinst for Tyssedal, der ein i dag brukar kol som tilsetjingsstoff i prosessen, seier Harestad.

Han meiner det vert krevjande å få på plass produksjon og distribusjon av hydrogen, og at det er mykje som må på plass for at ein skal få dette til.

– Det må satsast nasjonalt for å få til eit berekraftig distribusjonsapparat. Men det skjer ting i marknaden; Spetalen har til dømes investert i eit dansk hydrogenselskap. Vi trur dette skal løna seg på sikt, men har ikkje kome til reknestadiet for å finna ut kva vi kan tena på dette enno.

Alternativ kraft

Konsernsjef i SKL Magne Heimvik seier at kraftlaget byrja å tenkja alternative bruksområde til fornybar kraft då selskapet vart ein rein kraftprodusent 1.januar i år. Han trur hydrogen kjem til å bli teke i bruk av stadig fleire marknadar. Bilparken er eitt døme.

– I Japan brukar mange bilar hydrogen. Målet vårt er å bidra til fornybarsamfunnet, og finna måtar å nytta vasskrafta vi produserer til å finna nye løysingar som er bra for klimaet, seier Heimvik.

TTI satsar på å tredobla produksjonen ved smelteverket, og får dei det til er det all grunn til å tru at SKL kan verta kraftleverandør til store mengder hydrogen mange år framover.