Set opp 33 vegljos

Endeleg er pengane på plass, og innbyggjarane på Langgot kan sjå fram til å få vegljos langs den travle fylkesvegen i løpet av året.

På møtet sitt den 27. april hadde Fylkestrafikksikringsutvalet i Hordaland, der mellom anna Synnøve Solbakken (Ap) er medlem, vel 10 millionar kroner å fordela til ulike prosjekt innan punktutbetring og tryggare skulevegar. 17 kommunar sendte inn til saman 26 søknader. Kvinnherad stilte med tre prosjekt; vegljos ved Langgot og Husnes industriområde, vegljos og busskur på Løfallstrand, og trafikkseparering ved Gjermundshamn ferjekai.

12 av søknadane vart krona med suksess, deriblant éin frå Kvinnherad. Utvalet løyvde nemleg heile 1,7 millionar kroner til å setja opp 33 vegljos gjennom Langgot. Det vert stilt krav om at tiltaket må vera ferdigstilt i løpet av 2016 og at kommunen er ansvarleg for både gjennomføring og kostnader.

– Ettersom tiltaka er på fylkesveg er det svært viktig at kommunane så snart som mogleg tek kontakt med Statens vegvesen for nærare avklaringar vedkomande utføringa, heiter det i vedtaket.