Skadd køyrebru på Ranavik - ferja går frå Sunde

OPPDATERT: Klokka 15.40 tysdag ettermiddag vart det meldt at ferja mellom Ranavik og Skjersholmane er mellombels innstilt. Ferja går no frå Sunde.

Norled har hatt nokre tunge dagar i Kvinnherad. Onsdag i førre veke og i går var det periodar med store tekniske problem på sambandet Gjermundshamn-Årsnes. No i dag er Ranavik-Skjersholmane råka. Grenda har fått melding om at sylinderen for løfting av køyrebrua er knekt, og at ferja dermed sit fast.

Siste nytt er at bilane no køyrer til Sunde, der MF "Hardingen" vil gå i rute. Konkret betyr det at Rute 1 går mellom Sunde og Skjersholmane, medan rute 2 er innstilt. Kor lenge denne løysinga vil gjelda, er førebels ikkje opplyst.

Det er verdt å nemna at det ikkje er Norled som har ansvaret for vedlikehald av køyrebrua og mekanikken der.