Skal visa seg fram som musikarar
Lærarane i kulturskulen skal visa at dei også er profesjonelle utøvarar av faget sitt når dei held gratiskonsert på kulturskulesenteret fredag kveld.
– Vi håpar både born og vaksne kjem for å høyra. Eg trur det er inspirerande for borna å sjå kva lærarane deira kan, seier kulturskulerektor Kirill Zimin.
Konserten er ein del av eit prosjekt i kulturskulen, der lærarane skal bli betre kjende, og jobba saman på tvers av faga.
Artikkelen held fram under annonsen.
– Dette er viktig for utviklinga av faget og for den sosiale biten, seier Zimin.
Alle lærarane i kulturskulen er også profesjonelle utøvarar.
– Ikkje alle elevar og foreldre i kulturskulen veit kor gode musikarar dei er, og vi trur konserten er ein god måte å visa fram kva dei kan, seier kulturskulerektoren.
Fleire av lærarane har valt å læra seg noko nytt i løpet av prosjektperioden. Dei lærer gjerne av kvarandre.
– Musikk er eit språk som sameinar folk, og samarbeidet vi har hatt gjer lærarane våre meir samansveisa, seier Zimin.