Skatt og kraft gav overskot for fylket

Vestland fylkeskommune fekk eit godt økonomisk år i 2022.

Årsresultatet for fylket viser at disposisjonsfondet auka med 371 millionar kroner etter at mindreforbruket i 2022 er lagt til. God skatteinngang og større kraftinntekter enn budsjettert vert trekt fram som årsaker.

– Vestland har kome godt gjennom dei krevjande åra med pandemi. Når næringslivet i fylket går godt, gjev dette høgare skatteinntekter enn vi rekna med. Kombinert med god økonomistyring og nøktern pengebruk i alle avdelingar, har dette resultert i eit mindre-forbruk som kan setjast av til viktige satsingar i åra framover, seier fylkesdirektør Rune Haugsdal til Vestland fylkeskommune si nettside.

Totalt gav skatteinngangen ei meirinntekt på 282 mill. kr i forhold til budsjett. Utviklinga i straumprisane gjorde også positivt utslag for konsesjonskraftinntektene, som enda 68 mill. kr over budsjett.

Vegane

Trass godt resultat; også fylkeskommunen merkar presset frå aukande prisar og renter. På driftsbudsjettet viser dette seg særleg i kontraktane for fylkesvegvedlikehaldet, medan det på investeringssida har vore høg vekst på mange av innsatsvarene både for bygg- og vegutbyggingar.

Nokre nøkkeltal for 2022:

* Totale driftsinntekter: 16.813 mill. kr.

* Netto driftsresultat: 1.189 mill. kr (7,1%)

* Totale driftsutgifter: 14.680 mill. kr (ekskl. avskriving)

* Investeringar: 6.008 mill. kr

* Lånegjeld: 15.238 mill. kr