Skipar skidag til kundane

Husnes storsenter tar på seg spanderbuksene og inviterer alle sine kundar til ein gratis skidag i Fjellhaugen 26. mars.

– Det bli knall. Spesielt med det fine vêret som er meldt, spøkar senterleiar Geir Jakobsen.

For sjølv om det i dag er dårleg med snø i Fjellhaugen, har senterleiaren som venleg klokketru på at vêrgudane spelar på lag med storsenteret.

– Sjølvsagt blir det snø. Det har kome snø dei to siste dagane, så det tar eg heilt med ro. Nok snø blir det, og vi gler oss til ein fin dag i fjellet, seier han.

Storsenteret byr på både gratis skikort og bålgrilla pølser. Det for å visa at dei set pris på kundane sine.

– Vi har alltid lyst å gi dei fantastiske kundane våre noko tilbake. Noko som ikkje er direkte knytt til handel. Og då tenkte vi at ein fin dag i fjellet måtte vera perfekt, seier Jakobsen.

I tillegg til fyr i bålet, blir det skishow, langrenn og fleire prestisjetunge konkurransar.

– Litt konkurranse må det sjølvsagt bli. Vi set opp ei storslalåmløype og har planar om å kåra ein kvinnheradmeister i både storslalåm og aking. Så det blir knallhard konkurranse med høg prestisje. Som regjerande akemeister for Oasen i Sauda, så veit eg kva det går i, ler Jakobsen.

Storsenteret har tidlegare arrangert liknande skidagar, men då berre for sine tilsette.

– Vi hadde ein strålande skidag for to år sidan, og tenkte no å gjera det same. Men kvifor ikkje utvida og invitera alle som ynskjer det. Det kan fort bli dyrt for ein familie å ta alle med opp i trekket, så no får alle ein moglegheit til å oppleva skitrekket gratis. Så vi gler oss,  seier han.