Skremmer sauene: Politiet etterforskar motorsykkelkøyring i fjellet

Videoar av motorsyklistar som jagar på sauer i Fjellhaugen-området sirkulerer på TikTok og Youtube. Politiet har starta etterforsking av køyringa.

«Denne publiseringen var i strid med Vær Varsom-plakatens regler for god presseskikk. Les uttalelsen fra Pressens Faglige Utvalg her https://pfu.presse.no/pfu-basen/23-185.»

– Me har fanga opp ein del køyring me reagerer på i Fjellhaugen og innover, med både registrert og uregistrert motorsykkel. Éin motorsyklist har erkjent forholda, og noko av køyringa har ein video av, medan annan køyring er fanga opp av dei med dyr på beite i området, fortel Sigurd Børve til Grenda.

Bekymringsmeldingar

Han refererer til at dyr – i hovudsak sauer – blir skremt og skada som følgje av det han kallar uheldig køyreåtferd.

– Det strir både mot vegtrafikklova og dyrevelferd. Nokon av videoane viser at det er dyr langs vegen, og at desse blir skremde og plaga av køyringa. Me er kjent med slike videoar, og har fått bekymringsmeldingar frå beiteeigarar om dette, opplyser han vidare.

Politistasjonssjefen ser trafikken i Fjellhaugenområdet og vidare innover i fjellet som eit todelt problem.

– Dei som har dyr, har rett til å ha dei de. Dei merkar at det har blitt ein monaleg auke i trafikken grunna turismeauken i området. Og så har ein den delen som me etterforskar her. Det er bråk og støy, køyring på bakhjulet, og det fører til skade på dyra enten direkte, eller indirekte ved at dei spring til dei sprenger seg, forklarer Børve.

Uroa

Kathrine Haugland i Bjørnebøle Beitelag er uroa over det ho høyrer.

– Me hadde årsmøte i Bjørnebøle Beitelag på måndag, og fekk vita om politimeldinga då. Saka var nok meldt tidleg i sommar, men den siste av videoane kom ut nok nyleg. Me er jo sjokkerte. Lydnivået og farten er høg, me er redde for at det skal gå gale igjen, seier Haugland.

For to år sidan fann ho ein påkøyrt sau i live ved Bjørnebølsbeitet, men med brekt fot og beinpipa stakk ut gjennom huda. No er det ikkje berre reine påkøyrsler ho uroar seg for.

– Sauene blir sprengte viss dei spring for fort, som dei gjer når dei blir skremde og jaga. Difor er det livsfarleg det dei på motorsyklane driv på med, og det er dyremishandling, påpeikar sauebonden.

Sauene på veg heim

Haugland fortel det framleis er mykje trafikk oppover i fjellet, og mange som campar – inkludert dei som bur der oppe i bilane.

– Dette er noko som gjer at ein vurderer å gje seg med å ha sauene der oppe. Ein er glad i dyra sine, og vil ikkje sjå at dei blir utsett for fare. Me har ikkje visst om at dette har føregått, men når dei filmar det og legg det ut, så har ein jo bevisa for det. Men det er ikkje kjekt, kommenterer ho.

Haugland fortel ho er oppe på beitet og ser til sauene minst eit par gonger i veka.

– Sauebøndene har auka eigeninnsatsen monaleg no siste åra. Det blir mange turar opp i veka både sommaren og hausten gjennom. No er sauene klare for å koma seg heim, og har byrja og samla seg langs vegane. Då er dei endå meir utsette for trafikk, sluttar no.