Skulle henta dottera – hadde 2,15 i promille

Ein mann frå Kvinnherad er dømt til fengsel i 23 dagar etter å ha køyrd bil i rusa tilstand ved to ulike høve.

Fyrst ein dag i mars 2017 då politiet stoppa han då han var på veg for å henta dottera si på skulen. Mannen innrømte då at han hadde drukke sprit kvelden i forvegen, og at han hadde drukke noko øl like før han sette seg bak rattet.

Blodprøven som vart teken éin time etter at han vart stoppa av politiet, viste ein alkoholkonsentrasjon i blodet på 2,15 promille. I tillegg gav prøven eit utslag på THC. (Eit stoff som finst i hasj eller cannabis)

Tre månadar seinare vart mannen igjen stoppa av politiet. Også då var han påverka alkohol. Då med ein alkoholkonsentrasjon i blodet på 1,12 promille.

Mannen vart i Sunnhordland tingrett dømt for ei rekkje brot på vegtrafikklova. Både for å ha køyrd bil i alkoholpåverka tilstand og for å ha køyrd utan gyldig førarkort. Han er også dømt for bruk av narkotika.

Det betyr at han må sona 23 dagar i fengsel, betala ei bot på 10.000 kroner og ta føtene fatt dei komande tre åra.