Skyss skiftar billettsystem og opnar for kjøp på nett

I løpet av 2021 vil Skyss gradvis byta system i alle bussane i tidlegare Hordaland.

Skyss sitt gamle billettsystem er modent for utskifting og vert no skifta ut. I løpet av hausten 2020 fekk Skyss mange nye bussar i Bergen, og nytt billettsystem er installert i alle desse. Vidare vil det nye systemet gradvis bli installert i alle Skyss sine bussar i gamle Hordaland fylke.

– Sidan bytet skjer gradvis, vil ny og gamal løysing leva side om side ei stund, skriv Skyss i ei pressemelding.

 

Ny nettbutikk

Implementeringa av det nye billettsystemet fører ikkje til endringar i den populære «Skyss billett»-appen. Ein app nærmare 80 prosent av dei reisande nyttar seg av, står det å lesa i pressemeldinga.

I tillegg til endringane i billettsystem, opna Skyss sin nye nettbutikk måndag 18. januar. Her kan reisande kjøpa både enkeltbillettar og periodebillettar til buss, bybane og båt.

– Vi er glade for at vi no kan tilby billettkjøp på nett, slik at dei reisande får fleire alternativ når dei skal ut og reisa. No kan ein sitja heime og kjøpa billetten i ro og mak. Nettbutikken er meint som eit tillegg til mobilappen vår, og for dei aller fleste vil appen framleis vera den beste og enklaste løysinga, seier avdelingsleiar Svein Book Dalsgård i kundeopplevingar i Skyss i ei pressemelding.

 

Dyrare båtreiser

Fredag 15. januar sette Skyss ned prisen på alle periodebillettar for bybane og buss i tidlegare Hordaland. Prisen for enkeltbillettar og 24-timarsbillettar vert uendra.

I tillegg til det innfører Skyss no ein felles ungdomsbillett i heile Vestland fylke. Det betyr i praksis at ein med sin ungdomsbillett i Skyss også kan reisa i tidlegare Sogn og Fjordane, og visa versa.

– Det er gledeleg at vi kan lansera felles ungdomsbillett som eit første steg, og så vil vi arbeida med å få resten av puslespelet på plass så snart vi kan, seier direktør Målfrid Vik Sønstabø i Skyss og peikar på samanslåinga av Skyss og Kringom.

Men sjølv om bussprisane vert uendra eller rimelegare, aukar Skyss no prisen på båtbillettane sine i Vestland med 2,5 prosent.

– Det gjer vi i takt med den generelle løns- og prisveksten i samfunnet, står det å lesa i ei pressemelding.