Slik blir dei nye elektriske ferjene i Kvinnherad

1. januar 2020 skal dei fleste ferjene til og frå Kvinnherad elektrifiserast. Skipsdesignarane Multi Maritime melder at dei har fått ordrar på fem ferjer i løpet av dei to første månadane i år.

Alle dei fem ferjene skal driftast gjennom elektrisitet til vanleg, men dei får også installert generatorar for biodiesel som back-up. Fjord1 ASA har bestilt fire av ferjene. Tre av dei vil bli om lag 85 meter lange, og vert bygd etter det nye designet «MM82FE EL». Ferjene vil ta 83 bilar og 299 passasjerar, inkludert mannskap.

– Ferjene vil vera i drift på utfordrande ruter, melder skipsdesignarane.

To av ferjene vil gå mellom Ranavik og Skjersholmane. Det er ei rute på 14,2 kilometer, og farten vil verta 13 knop. Batterikapasiteten på ferjene vert opp til 5000 kW.

 

Tre ferjer til Kvinnherad

Multi Maritime melder at den tredje ferja vil gå mellom Gjermundshamn og Årsnes. Dei tre ferjene som skal gå i ruter i Kvinnherad skal byggjast på Sefine Shipyard i Tyrkia, og vil bli leverte i tredje og fjerde kvartal av 2019.

– Bestillingane stadfestar at Multi Maritime er i teten når det gjeld utvikling av grøn skipsdesign. Etter dei fem nye bestillingane held utviklinga med å finna energieffektive løysingar fram, skriv dei på si eiga nettside.

Den fjerde ferja skipsdesignarane har teikna skal gå mellom Jondal og Tørvikbygd, og den femte skal inn i sambandet Kvanndal-Utne.