Slik gjekk det då dei prøvde seg på surstrømming

Det vart både mykje latter og oppkast då denne gjengen prøvde seg på den svenske delikatessa surstrømming.

For vel eit år sidan kjøpte Daniel Sætre ein boks surstrømming i Sverige. Etter at hermetikkboksen hadde låge lagra på boden i eit år, inviterte Daniel ein vennegjeng på smaksprøve i Bogsnes i midten av mai. Og sjølv om ingen klarte å få i seg den rotne fisken, fekk dei ei oppleving utanom det vanlege.

– Det går ikkje an å forklara den lukta. Du merker med eingong at dette er ei lukt du aldri har kjent før, og eg trur ikkje noko lukter det same. Eller kanskje eit lik lukter det same, men det veit ikkje eg. Eg har aldri lukta på eit lik, seier Daniel.

Han hadde fått det ærefulle oppdraget med å knekka open hermetikkboksen, men som følgje av at magen slo seg vrang, var det eit oppdrag som gjekk på omgang.

– Det var ein slags kjemisk reaksjon, kroppen reagerte med oppkast. Mykje oppkast. Eg hadde gangsperr i både mage og rygg ei veke etterpå på grunn av all spyinga, seier Daniel.

Som likevel vil anbefala andre å testa surstrømming.

– Sjølv om vi ikkje åt, så var det ei interessant oppleving. Så det er berre å prøva, ler Daniel.