Slik oppsummerer ordføraren rådmannsaka

I eit lengre innlegg på Facebook kjem ordførar Peder Sjo Slettebø med si oppsummering av rådmannsaka.

Her er oppsummeringa i sin heilskap:

Det har vore nokre krevjande veker i Kvinnheradpolitikken. I det som har vore ein historisk stabil periode kom vi no i ei vanskeleg sak. Her kjem mi oppsummering:

Den 6. april i år går to mann frå Folgefonnsenteret inn på rådhuset. Med seg ut får dei eit lån på 6.000.000 kommunale kroner. Kommunestyret har rett nok gjeve garanti på dette lånet tidlegare, men aldri sagt ja til å overta det eller gje eit lån på eigne vilkår.

Ingen politikarar er informerte, sjølv om slikt skal avgjerast av dei folkevalde. 

Eg finn det ut ved at ein partikollega tilfeldigvis oppdagar at det er inngått ein låneavtale. Rådmannen hevdar å ikkje kjenna til det. Vi hadde haldepunkt for at han kjende til det. 

Når eg så ber rådmannen legga fram sak om det til formannskapet kjem det ei sak som er direkte misvisande for formannskapet. Politikarane skulle altså ta ei avgjerd på sviktande grunnlag. Det var i tillegg dekka over at det allereie er inngått ein låneavtale.

Slik kan vi ikkje ha det. Enkeltpersonar skal ikkje kunna gå inn på rådhuset, snakka med administrasjonen og få med seg 6 millionar skattekroner utan ein ordentleg plan for korleis dei skal betalast tilbake. At formannskapet ikkje får rett informasjon er eit demokratisk problem og kan påføra kommunen ansvar ein ikkje kjenner rekkevidda av. 

Eg hentar inn juridiske råd frå to advokatar. Dei er tydelege: Det bør opprettast personalsak mot rådmannen. Det gjer eg, og det heile endar med at rådmannen sjølv vel å gå av.

I denne saka har eg gjort det ordførarvervet krev av meg. Eg skal på vegner av kommunestyret sjå til at Kvinnherad kommune blir styrt av dei folkevalde. Når det ikkje skjer skal det få konsekvensar.

Eg har fått tildels sterk kritikk. Det har eg forståing for, men eg meiner eg har gjort rett og eg har fulgt klåre råd. 

Eg har sjølv bede om at kontrollutvalet i ettertid går

gjennom denne prosessen. Det er alltid noko å ta lærdom av, og vi kan utarbeida rutinar på dette om kommunen skulle havna i ein slik situasjon igjen.

Når det er sagt stiller eg meg uforståande til delar av kritikken. Nokon meiner eg skulle stoppa saka på eit tidlegare tidspunkt. Andre meiner eg aldri burde oppretta den. Det ville i så fall vera mot juridiske råd. Det blir som å seia at tvilsame tilhøve heller skal feiast under teppet framfor å ryddast opp i. Det er kanskje meir behageleg, men det er ikkje rett.

Andre ville konkludera før alle fakta låg på bordet.

Eg føler det av og til gjekk politikk i denne saka. Enkelte vart meir oppteken av prosessen og korleis den kunne vore framfor å stilla det spørsmålet som var sjølve saka: Er det dei folkevalde, eller er det administrasjonen som skal ta avgjerdene i prinsipielle saker? Er det greit at dei folkevalde vert feilinformert, eller er det ikkje greit? Svaret på dette gir seg sjølv etter mitt syn. Dersom vi meiner at dei folkevalde skal styra og vi forventar at administrasjonen skal gje oss eit skikkeleg avgjerdsgrunnlag, var det i denne saka naudsynt å stilla rådmannen til ansvar for at så ikkje skjedde.

No skal vi legga denne saka bak oss. Vi skal sjå framover til beste for Kvinnherad kommune. Vi skal bygga fleire vegar og utvikla sentrumsområda våre, det skal realiserast idrettshall og vi skal effektivisera enno meir og

forbetra tenestene våre. Vi skal få til betre kommunikasjonar inn og ut av kommunen slik at fleire unge vil flytta heim.

Det er kommunen sine mange tilsette som er nøkkelen til å oppnå dette. Sjølv om det dei siste vekene har blese på toppen, er våre trufaste medarbeidarar kvar dag på jobb for innbyggarane. Det held dei fram med, trass skifte av leiing og debatt i kommunestyret.

Eg er svært glad i Kvinnherad, det er difor eg har stilt til val og teke på meg dette vervet. Dei siste vekene har denne saka teke all tid. No gjeld det å børsta av seg støvet og bretta opp ermene igjen. Dette skal gå fint!