Snarleg utbetring ved Kroka

Går det som Statens vegvesen planlegg, kan ytterlegare 150-200 meter av Krokaparsellen bli utvida i haust.

Prosjekteringa er allereie i full gang, og prosjektleiar Terje Dagestad i Statens vegvesen vonar ei snarleg utlysing kan resultera i oppstart rett over sommaren.

– Vi har 6 millionar kroner til prosjektet, så det er ikkje så mykje pengar vi snakkar om. Får vi 150-200 meter veg ut av midlane så skal vi vera nøgde, seier Dagestad til Grenda.

Han opplyser at det er strekninga mellom Kroka og Sunndal som står på programmet denne gong, men ein skal ikkje berre fortsetja der ein slutta førre gong.

– Det var eit ynske frå kommunen om å finna nokre uoversiktlege klyper der møtande trafikk kjem litt brått på og prioritera desse. Difor skal vi ikkje byrja nøyaktig der arbeidet stansa sist, men bevega oss litt nærare Sunndal. Men det vert ikkje ei klattvis utviding av vegen, vi skal laga ei samanhengande strekning med breiare veg, opplyser Terje Dagestad.