Sondre Justad kjem til Husnes

27.oktober kjem Sondre Justad for å spela i Festsalen på Husnes.

– Konsertane han har halde til no har vore veldig gode, og eg er heilt sikker på at dette vert ein veldig bra konsert også, seier konsertansvarleg Oddbjørn Kloster.

Justad gav ut den første singelen sin «Nu har du mæ» på Petroleum Records i 2014, men det verkelege gjennombrotet kom i oktober 2015 med debutalbumet «Riv i hjertet». Albumet til 27-åringen frå Henningsvær og Borg i Lofoten låg på VG-lista i over eitt år, og fekk terningkast 5 av Aftenposten, Dagsavisen, Avisa Nordland og Fædrelandsvennen. Justad vart nominert til Spellemannprisen i klassane popsolist, årets album og årets nykomar, og vart også nominert som årets liveartist og årets låt under P3 Gull i 2016. Frå oktober 2016 tok Justad pause på ubestemt tid, for å fokusera på nye låtar og vegen vidare. Nesten nøyaktig eitt år seinare kom det ny musikk. Med ei vekes mellomrom vart låtane «Ingenting» og «Paradis» sleppt. Begge gjekk rett inn på radiolistene, og i vår kom andrealbumet «Ingenting i Paradis».

Ved sida av musikken har Justad vist eit brennande engasjement for miljø og politikk. Han har blant anna brukt stemma si i kampen for å hindra olje- eller gassverksemd utanfor Lofoten, Vesterålen og Senja, og har fleire gonger uttalt seg kritisk om Noreg si handtering av flyktningkrisa.

Justad skapte overskrifter etter deltakinga hos NRK sitt talkshow «Lindmo» 24.mars, der han uttala at han var open for kjærleiksforhold til både damer og menn.

– Eg har kjent på at eg rommar meir, at kjærleiken er større. Eg trur ikkje det treng å vera damer eller menn for min del. Det kan henda det går bra med begge deler, sa han til programleiar Anne Lindmo.