Sp møtte dei tillitsvalde

Senterpartiet inviterte til ope møte i Uskedalen tysdag kveld. Tre fagorganisasjonar og éin rektor møtte fram og fortalde om utfordringane deira sektorar står ovanfor.

Til samlinga hjå Elins matgleder stilte 16 Sp-politikarar og tillitsvalde. Møteleiar Hans Inge Myrvold kalla det ein uformell, politisk kveld.

– Vi skal prata om laust og fast, om kor vi står og kor vi vil. Dette skal vera ein inputkanal til arbeidet i programnemnda vår, innleia han.

Temaet for det fyrste møtet i serien Sp har kalla «Skråblikk på Kvinnherad» var kommunal forvaltning. Einingsleiar for det som heiter Rosendal skule, Bjørn Olav Tveit, tykte det var eit prisverdig initiativ, og hadde gjort seg nokre tankar som han delte med forsamlinga. Han slo fast at det føregår utruleg mykje på utdanningsfronten i heile verda.

– Og det kjem til Kvinnherad og til Rosendal ungdomsskule, og vi skal gjera vår greie ut av det, fortalde han, og gav som døme at Singapore no har bestemt seg for å gå vekk frå eksamen.

 

Overflatisk

Vidare fortalde han at mandatet til skulen blir kraftig utvida i åra framover. Faktorar som kreativitet, problemløysing, sosial kompetanse og liknande skal bli meir vektlagt. Ny læreplan skal på høyring til våren og takast i bruk frå 2020.

– Vi skal no leggja til rette for djupare forståing for elevane, på tvers av fag, når det gjeld tilhøve som til dømes klima og migrasjon. Vi har vore for overflatiske i skulen, det må vi berre erkjenna. Skulen skal òg bli ein tydlegare formidlar av verdiar, sa han.

Det vert òg auka krav til kontinuerleg og systematisk arbeid. Før hadde Malmanger skule ein plan for handtering av mobbing på éi side, den nye vert truleg på kring 16 sider.

Atie Skarveland frå Utdanningsforbundet skaut inn at det ikkje finst nokon typisk gjennomsnittsklasse i Kvinnherad-skulen.

– Snittet vert sagt å vera på 15-16 elevar, men det er berre nokre få klassar av den storleiken her. Andre klassar har oppimot 30 elevar. Dette er det viktig å vera klar over, meinte ho.

 

Sjukepleiarar

Bodil Stoknes, hovudtillitsvald for barnehagar i Utdanningsforbundet, informerte at dei fleste barnehagane i Kvinnherad har ope frå 06.30 til 16.30.

– Det er svært viktig med nok personale i heile opningstida, det er ikkje tilfelle i dag. Det vil krevja pengar og mot å gjennomføra dette, men det trur eg Senterpartiet har, kommenterte ho.

Evelyn Mehl Willumsen, hovudtillitsvald i Norsk sykepleierforbund, kunne på si side opplysa at både Kvinnherad og andre kommunar slit med å rekruttera sjukepleiarar. I Norge manglar det no 5.900 slike fagpersonar. Ho viste også til ei undersøking der det kjem fram at ti år etter fullført utdanning, så jobbar kvar femte sjukepleiar ikkje i helsesektoren lenger. Noko som har fleire årsaker: Tidspress, dårleg løn, og at dei må jobba åleine med stort ansvar. I tillegg kan det vera eit problem at fagmiljøet er for lite, men slik er det ikkje her.

– Fagmiljøet i Kvinnherad er ikkje lite, men det er ingen arenaer der ein kan møtast og utveksla tankar og erfaringar, sa Willumsen.

Deltid

Ho kunne elles fortelja at i Kvinnherad kommune får alle som ynskjer 100%-stilling det. Clara Hveem stussa over utsegnet, sidan det i kommunestyret nyleg vart reist kritikk mot at kommunen har så mange deltidsstillingar.

– Jobbane blir utlyste som mindre enn 100%-stillingar, og det er eit veldig dårleg signal. Det er noko gale med utlysingsteksten, meinte Line Haugland, hovudtillitsvald i Fagforbundet.

– Men det er ikkje mange sjukepleiarar som går i 100%, supplerte Evelyn Mehl Willumsen.

Line Haugland la elles vekt på å få flest mogleg over i 100%-stillingar.

– Vi må slutta med 4-, 5- og 6-timars vakter. Det er ei myte at heiltid kostar, sa ho, og la til at Bergen kommune frå neste år kun skal lysa ut fulle stillingar.