Spanande føredrag om livsgrunnlaget vårt

Måndag 5.februar kjem Dag Jørund Lønning til kommunestyresalen i Rosendal for å halda eit føredrag med tittelen «Det fantastiske universet under føtene våre».

Lønning kjem for å presentera «Jordboka» som kom ut i haust, og som har fått svært gode kritikkar. Lønning er professor ved Høgskulen for landbruk og bygdeutvikling på Jæren, og kjend som ein glitrande føredragshaldar og retorikar – helst om tema som menneskeleg nyskaping og det å utvikla garden og bygda nedanfrå.

Det er Landbrukskontoret i Kvinnherad, Kvinnherad og Kvam Bonde- og småbrukarlag, Ølve og Hatlestrand Bondelag og lokallag av Norsk Økologisk landbrukslag som har invitert Lønning til Rosendal, og møtet vert halde med støtte frå Fylkesmannen i Hordaland.

– Vi ønskjer å invitera alle lag, organisasjonar og alle som er interesserte i jord og helse til føredrag og samtale med forfattaren av «Jordboka», seier arrangørane.

– «Jordboka» er historier om menneske og mold. På godt og vondt. Gjennom ei rekkje kortare og lengre essays utforskar forfattaren kva mold eigentleg er, korleis vi menneske forstår og brukar mold, og, ikkje minst, kva molda kjem til å bety for oss i framtida, heiter det på nettsida til «Jordboka».

Boka handlar altså om matjorda vår, om åtak på molda og om den nye, grøne revolusjonen.

– Den kan koma til å endra både landbruk, hagebruk og forholdet mellom menneske og natur for all framtid, kan ein lesa på nettsida.

Arrangørane inviterer til eit spanande føredrag om ein morgondag som vedkjem oss alle.

– Måten vi dyrkar jorda på verkar og inn på både miljø og klima, minner dei om.