Spanderer gjerne julemiddagen din

Sanko Ahmed Faraj vil gjerne spandera pinnekjøtmiddag, god drikke og gåver til 20 utvalde personar i restauranten sin Sana Kebab på julaftan.

– Eg har veldig lyst å arrangera, men folk må våga å melda seg på. Eg håpar inderleg at nokon kontaktar meg, seier den gåvmilde restauranteigaren.

Sanko har mange kundar i løpet av året, og har lagt merke til at nokre av dei som kjem ikkje har så mange folk rundt seg. Det var grunnen til at han kom på å invitera til julemiddag.

– Ein treng ikkje å ha lite pengar for å melda seg på. Du må gjerne vera millionær. Men eg veit at nokon ikkje har tid til å reisa heim til jul på grunn av jobb, medan andre har eit problematisk forhold til familie eller vener. Og for mange er det også ganske dyrt å kjøpa inn julemat, seier han.

 

Har blitt glad i jula

Poenget er å ha ein kjekk og sosial kveld. Sanko vil ikkje at nokon skal sitja åleine på julekvelden. Sjølv kjem han eigentleg frå Nord-Irak, og hadde ikkje noko forhold til jula før han kom hit til landet. Men no har han fått sansen for både pinnekjøt og kålrotstappe.

– Det er lett å sjå kor viktig jula er for nordmenn. Sjølv er eg ikkje religiøs, men eg lagar julemiddag - særleg fordi dottera mi set pris på den norske jula, fortel han.

Sanko meiner det er jula som har inspirert han til å gjera noko fint for andre.

– Eg kallar det ein juletanke. Det er viktig for meg å vera til hjelp, og eg har lyst å bidra. Eg har fått så mykje av det norske samfunnet, og har fått sjansen til eit godt liv her. Derfor vil eg gjerne gje noko tilbake. Dersom det ikkje lukkast i år, vil eg spara pengane eg hadde tenkt å bruka og laga til noko endå større neste år, smiler han.

Sanko synest det er dumt viss folk som treng det ikkje nyttar seg av tilbodet hans.

– Eg har ein ny sykkel til deg, ver så god, kom og hent han, men når du ikkje kjem og hentar han så er det ikkje min feil. Då står han berre og rustar, seier han om den saka.

 

Vil at folk skal kosa seg

Sanko er full av gode idear til korleis han skal halda løftet sitt om å gje andre ei fin jul. Han låner gjerne ut restauranten, dersom folk heller vil arrangera noko sjølv.

– Det er mange måtar å gjera det på. Førebels er det ingen som har meldt seg på, men eg har fått ein telefon frå ein som gjerne vil hjelpa meg i restauranten den kvelden, fortel han.

Dersom nokon vil ha ei samling ein annan stad enn i restauranten, kan han kanskje bidra med å handla inn mat.

– Eg ønskjer at folk skal kosa seg med mat, drikke, musikk og gåver. Utan å betala. Og at dei ikkje skal vera åleine på julaftan. Men skal eg rekkja å handla inn og organisera må folk kontakta meg no, oppmodar han.

Og slår fast at dersom det berre blir to-tre personar som melder seg på, så tek han dei like godt med seg heim til familien sin.